MIERCUS AI 7 DI ZENÂR 2015

Juste ben te zornade de fieste de bandiere nazionâl taliane, miercus ai 7 di Zenâr 2015, il dean dal Moviment Civic Culturâl Alpin-Adriatic dal Fogolâr Civic, prof. Alberto Travain, al à ricevude, par man dal inteletuâl meridionalistic dot. Fernando Luisi, la gale rosse-liliade borboniche, simbul di chê resistence di popul, lungje e acanide, stade tal Ream Sicilian Dopleât cuintri di sei anetûts a la Italie chê savoiarde, une resistence passade par solit par brigantarie nome, li che invezit si jere presentade tant che une vuerilie no propit cence ancje un spirt patriotic legjitimistic. Il prof. Travain al à dit di tignîsi in bon pe stime pandude e al à ricuardât “la disgracie di un moment storic tant insanganât propit juste sul nassi di une Italie Unide fate sù malementri, che e à insotanade e po dopo ingaiade la int dal Meridion par mandâle a vore tes fabrichis de Alte bande bonât o ben di soldâts e burocrazie a controlâ lis tieris di confin bande jevât: une talianitât, duncje, di riviodile, di tornâ a incuadrâle, di tornâ a implantâle – se si vûl e se in timp – su altris fondamentis, se mai si pues federalistichis e europeistichis in clâf civistiche e magari ancje rivoluzionarie”. La cerimonie di conferiment e je stade a Udin in Place dai Grans alì dal poç di Sante Marie de Misericordie, chel antîc dal Ospedâl, intor de cunvigne dal Fogolâr Civic setemanâl, la prime dal 2015, stade, daûr costum, alì dal Bar Savio.