OTUBAR 2015 – IL PINSÎR DAL FOGOLÂR CIVIC

Cualchi dì prin de riclamade adun, dopo 502 agns, ai 29 Setembar 2015, de samblee di popul dal Comun di Udin che vie pe Storie i disevin Aregum o Arengo / Renc par cure dal Moviment Civic Culturâl Alpin-Adriatic dal Fogolâr Civic e cun chel dal Circul Universitari Furlan de Academie dal Friûl, il zovin confradi Francesco Nicolettis ur à spedît de Anglie al dean prof. Alberto Travain e socis une significative letare in lenghe furlane cuntun apassionât resonament in cont de democrazie. Ve ca un bocon, par auguri di un bon avignî pe vôs in cjapitul dal popul partint di chel cûr di Europe che e je stade simpri la Furlanie.
“Amîs, us scrîf dongje di une ricorence impuartantone, di un sucès dal Fogolâr Civic, di un event storic che nol sucedeve di anons: la riunion dal Renc chel di Udin! Al è stât propit chest fat che mi à impiade une riflession su la democrazie che e ven sù di dabàs, dal popul. Sino verementri sigûrs di volê afidâ al popul il podê di governâsi e detâ leç? Sino sigûrs che il popul al sedi cressût avonde par dismenteâsi dai interès personâi e pensâ a chei di une nazion? Ricuardìnsi che o stin tabaiant di chel popul che se tu i molis vincjedoi zuiadôrs e un balon al dismentee ogni probleme. O stin tabaiant di chel popul che par chel jessi furlan al vûl dî savê bevi cence incjocâsi e porconâ! O di chel dai zovins che a van a “Friuli Doc” no par scuvierzi un tic di storie enogastronomiche de lôr tiere, ma par incjocâsi cun vin e bire! O stin tabaiant dal popul che al va tes scuelis a fâ la predicje al professôr parcè che il fi nol meretave un vôt tant bas te verifiche! O stin tabaiant di un popul che nol à plui la idee di jessi un popul e che al è sierât daûr de puarte di ogni singule cjase. Se in Friûl a son scuasit un milion di personis, o pues dî che a son scuasit un milion di principâts, ognidun indipendent e ognidun cul spirt di tutelâ i siei interès parsore di cualsisei altre robe, freantsi di chei de comunitât! O sai, o soi stât vonde pessimist e o ai gjeneralizât lassant fûr chei pôcs che a fasin il contrari di ce che o ai scrit. Forsit chest rinovât Renc al podarà disveâ e insegnâ, planc plancut, ce che al vûl dî jessi un popul e vê une storie e une culture in comun! Mi ven sù une frase di un politic merecan dai timps di Lincoln che, interogât sul parcè che al cjapave posizions che no levin jù ai siei eletôrs, al à rispuindût: “Jo no soi stât elet par fâ i interès dai miei eletôrs! O soi stât elet par decidi ce che al è miôr pal avignî dal gno popul e di cheste nazion, parsore di ce che al pues plasê o no!”. O speri che chei che si riuniran il 29 a tegnin a ments che a son li par un interès ben plui grant di chel personâl. O speri ancje che a rivin, sfrutant chest event maraveôs, sì a puartâ e risolvi i problemis pratics, ma soredut a discuti dai problemis etics di une societât che e à completementri pierdût la fede in se stesse: la fede e la strade! Mi auguri di cûr che si rivi a tornâ a stabilî cheste tradizion di assemblee popolâr, metint in bande i miei dubis. Forsit une assemblee ben indreçade e regolade e pues vignî doprade come scuele par tornâ a educâ lis personis, par formâ di gnûf il lôr sens dal Stât e de comunitât prime di dut, poiantsi su la storie dal Friûl. Vive, duncje, il Renc di Udin e che al puedi puartâ ancje il popul furlan a riscatâ chei principis e chei valôrs che a jerin siei dai timps dal patriarcje Beltram! Che il Signôr e il Beât Beltram a dedin la lôr benedizion al gnûf Renc, a Udin e a dut il Friûl! Un salût de Anglie, il vuestri Checo”.