Chel document culì, di informazion, prodot di chê istesse gjenerositât di popul che di chê a vegnin ancje la vore insin la esistence dal moviment sociâl-culturâl civistic e euroregjonalistic dal Fogolâr Civic, al nas prin di dut de dibisugne storiche e morâl di une testemoneance direte su la vite e la opare ferbinte di resonament, messedament e promozion di une culture civiche inlidrisade e rignuvide tal cûr furlan de Mittel-Europe di un minût cenacul di citadins, difûr dai partîts e pûr indreçât di une carateristiche sô costituzion di principi e program che e à un cuart di secul di tradizion, fradaie che il so fin al è condurâ cul so trat, di stamp ideâl e sociâl: indurâsi e disfidâ il timp, il disinterès, la supierbie, la contrarietât di cierte chilose o ledrose societât dal dì di vuê, di ciertis supierbeosis, pusticis e debulis Istituzions, di cierts maiorents e di ciertis congreghis robe di paîs tant dispès e di une cierte stampe in particolâr, plene di aiars che no da râr juste e taie, e remene o e zire e volte cemût che i comude la vite di un teritori fasint pesâ sul stramandâ in concret des sôs memoriis tra chei che a saran dirits pustiçs di vite e di muart, purpûr insidiade in chest so monopoli dal ancje masse libar cjanâl informatic. Trop vivi sociâl di ogni sorte e degn di une note no isal dal dut scompartît de Storie vâl a dî de memorie de vicende umane par vie che di un tant nol è restât nuie, ancje propit in graciis che nissun cronist nol à pensât di menzonâ gran? “Plui lis stradis a son bandonadis plui la jerbe alì e cres” al à vût juste motivât sul nestri cont pre Tarcisio Bordignon, plevan storic e benemerit de perifarie di Baldassarie a Udin, che ricuardant cun nô i cinccent agns de resistence di popul dal puest cuintri des potencis europeanis de Rinassince, tal 2009 nus à vût indreçât une note di stime par chê mastine, antighe, indurance che o vin mostrade tal tignî bot decîs par tancj agns suntun agjî destinât, po si sa, a bandon e dismentie. Duncje, une sorte di notiziari in rêt intindût ancje ben par un at di rivolte incuintri de prepotence di une libertât di stampe che tal so non al è purpûr legâl sentenziâ, dut câs mai a palês, la “damnatio memoriae” di une fradaie che e da fastidi, che no si divoltile, no je poiade, no je imberdeade cun cierte politiche, no sta ai ricats che i tain sovenzions di chês publichis o privileçs, e, insopuartabil, e je rispietade distès e preseade parfin di figuris in grant des Istituzions, int di çugne, in Friûl, in Italie e in Europe. Une civiche, alore, braurose “declarazion di indipendence” prin di dut par sfrancjâsi fûr di cierte stampe locâl ‘in grant’. Ve mo il sens di chescj “commentarii”, metûts jù de sorestanzie dal Fogolâr Civic, in origjinâl furlan e talian, lenghis regjonâl e statâl dal Friûl, compagnâts in curt di versions e ristrets par inglês in mans di sâr Francesco Nicolettis, colaborant par chel cont, cul finâl in câs di vignî incuintri di plui ancje ben a la curiositât oltrane. Un rosari di fats di associazion riferîts di prime man, che si screilu cul spieli de liste des iniziativis dal Moviment tal 2014 a pene sierât. Une liste, a ogni mût, no complete, che, par un esempli, no son menzonadis dutis lis putropis jessudis dal “vessilîr gjenerâl” dal Fogolâr Civic, sâr Gianfranco Passone, che di tancj agns, cu la sô storiche bandiere cun parsore la acuile aquileiese, prin simbul euroregjonâl jenfri Alps e Adriatic, al fâs distinte testemoneance tes plui variadis ocasions di popul e di istituzion par dut il Friûl. A mancjaran tantis partecipadis e vivarosis riunions setemanâls dal Moviment te sô “capitâl”, Udin, e cetancj nons di partecipants a lis numerosis sôs iniziativis. Alc al mancjarà ma sôl cul ametilu in ideâl si pues tirâ dentri ancje chel che, purnò par taiâlu, si lu à lassat fûr. Debit onôr, in fin, partant, a chei che in chest ultin cuart di secul culì a àn dade une man a mandâ indevant une vicende di testemoneance culturâl coletive che e je contribût gjenerôs pe storia, pe identitât e par fâ programs in chest cûr antigon dal Continent Vieri che al è il Friûl, crosere che lis sôs lidrîs lis sprofonde dentri te liende de passade grande metropul internazionâl alpine-adriatiche e cosmopolitiche di Aquilee.
Prof. Alberto Travain
Coordenadôr Gjenerâl
FOGOLÂR CIVIC
Udin, ai 6 Zenâr 2015