SABIDE AI 10 DI MAI 2014

Une note – un salût e, cun chel, une osservazion culturâl – des sorestanziis des fradaiis dal Fogolâr Civic e de Academie dal Friûl e je stade mandade fûr juste pe adunade nazionâl dai alpins talians, ospitade a Pordenon tra i 9 e i 10 di Mai 2014. Ve culì il test. “Rispiet e ancje ricognossince pai alpins, ma no che si confondi, cemût che al sucêt masse dispès, la alpinetât cu la furlanetât. I Furlans no son nassûts cu la pene sul cjapiel. Prime de Prime e de Seconde Vuere, prime de unitât di Italie, tal 1866 l’orgoi militâr furlan, almancul chel de bande udinese, al podeve incrosâsi di dirit cun chel dal reziment di fantarie austro-venit numar 26, difensôr mastin di un imperadôr asburgjic che al jere ancje legjitim duche dal Friûl. E chel orgoi, fra Ete di Mieç e Rinassince, al podeve ben insedâsi tes cavalariis cjistielanis e tes fantariis contadinis armadis dal Parlament de regjon prime sot de presidence dai Patriarcjis di Aquilee, po dopo sot di un lutignint de Republiche di Vignesie. La furlanetât e je plui antighe de alpinetât e dal Stât nazionâl talian che la ultime menzonade si fâs bastion. Si dîs un tant cun riverence massime e cul plui cjâr salût ai alpins di Italie che si cjatin a fin di cheste setemane di Mai intune capitâl provinciâl furlane che e à te sô steme di seculorum i colôrs de bandiere austriache ros, blanc e ros. E un tant si dîs a ogni mût cuntun pont di braure – almancul pal Moviment Civic Culturâl Alpin-Adriatic dal Fogolâr Civic e pal Circul Universitari Furlan de Academie dal Friûl – di partignî a une storie plui lungje, che e à viodût jù pai secui i Furlans batisi e murî cun dignitât grande e tant fiât sui cjamps di bataie di dute la Europe e no dome, par difindi patriis, regnants, republichis, bandieris di ogni colôr, ma cun, dentri tal cûr, l’afiet e il ricuart dai fogolârs de lôr piçule patrie regjonâl nassude tal lontan 568. Si pues sei Furlans e alpins, ma nol covente par nie sei alpins – tant che ancjemò e sbandiere cierte propagande di place destinade ai sempliçots – par sei furlans fin te medole. Benvignûts alpins!”.