SABIDE AI 12 DI DICEMBAR 2015

“O sin costrets a travignî in ce che al è stât ce che in presint si varès bisugne e purpûr nol è: vuê no ‘nd è cuarps politics votâts dal popul cun funzions di control civic su parlaments statâi o regjonâi! Un tant, di ecezion, al jere in Friûl, tra Cinc e Sietcent, tal “Ancien Régime”: nuie nol reste cumò di chê storie, si ben che la Ete Contemporanie e à puartât dongje regjims professâts democratics e il control politic popolâr su la rapresentance publiche si à ridusude al so rignuvîsi ogni cinc agns midiant de cerimonie des votazions”. Ve ce che al à dit sabide ai 12 di dicembar 2015, te capitâl de Furlanie Storiche, il prof. Alberto Travain, dean dal Moviment Civic Culturâl Alpin-Adriatic dal Fogolâr Civic e dal Circul Universitari Furlan de Academie dal Friûl, che, in cunvigne prin di dut cu la Federazion provinciâl udinese dal Istitût nazionâl talian dal Galon Turchin, cul Club Unesco di Udin e la Fradaie citadine dal Crist, a àn tornât a celebrâ la lôr anuâl “Zornade de braure civiche regjonâl” sot dal inovâl civîl impuartant e pûr par solit dismenteât de Pretension de Contadinance dal Friûl (1503), implant fûr dal ordenari pal control di popul sul guvier dal teritori, svant particolâr e contribût locâl ae storie gjenerâl de democrazie: “un principi di dignitât dal sempliç citadin che trop che al è tibiât a bastaressin a pandilu ancje nome ciertis supierbeosis mancjadis rispuestis di Publics Rapresentants e Aministrazions a mes e domandis de int!”. Si son dade cunvigne alì de scjale di tramontane de biele Loze dal Lionel, la jentrade antighe dal municipi di Udin che ai 9 di Dicembar juste di 512 agns prin al veve dât bon acet aes delegazions contadinis che a pretindevin di meti sù un cuintri-parlament di popul de regjon tant che cuintrialtâr a pet de libare paronance des sorestanziis furlanis dai timps. Par ricuart dal fat, su pe scjale storiche si à metût fûr un grant standart di 10 metris, cui colôrs de Contadinance, adotâts e proponûts dal Fogolâr Civic par tricolôr di fradilance e moviment dai citadins, riferît par altri ai simbui di Aquilee e de Europe, i doi cjaveçs che fra chei si davuelç chê inviulazion de culture civiche inlidrisade te cussience storiche che al è il trat specific de ativitât sociâl di chel ciert cenacul di popul. “Un Friûl, un Friûl Vignesie Julie, une Italie, une Europe ‘dai Citadins’ sul plan pratic in vuê no esistin o a son juste un fonts par une politiche decidude di pôcs che di titui di contestazion ‘dal bas’ seris no ‘nd è” al à dit Travain: “se no juste un esempli, mutatis mutandis, chê Contadinance furlane storiche, unic moderni rivoc dai tribuns de plebe romane, e pues sei une idee di dulà partî par un resonament su la situazion de democrazie tes tant magnificadis ‘democraziis di Ocident’!”. La compagnie po daspò si è cjatade, su consei de studiose dot.e Marisanta de Carvalho di Prampero, in Bordolee didentri, sul cjanton tra contradis Raussêt e de Pueste, par un altri moment memoriâl sul puest li che storichementri e jere la Cjase de Contadinance chê viere, puartade in Cjistiel tal 1931, là che e je cumò. Il prof. Travain al è tornât in curt su la storie de sorestanzie popolâr furlane dai Vot Sindics de Contadinance – cuatri di là e cuatri di ca de Aghe – metint in lûs presis e pecjis che le àn segnade dilunc pôc o trop trê secui che e je lade indevant. Si à cussì rignuvît, in fieste e familiaritât, une cunvigne sociâl-culturâl che si rinove dal 2003, che a jerin i 500 agns de Pretension de Contadinance, tant che une libare celebrazion dal sens di comunitât, de braure civiche teritoriâl, di une “autonomie partecipadore” tai puescj adats, di no podêle sierâ tes schemis di cierts ‘baronâts’ politics democratics che a sparonsonin ancje ben in plen regjim republican. A jerin cu lis lôr bandieris, su la ocasion, dutis lis sezions vâl a dî i “cuintîrs” udinês e furlans dal Fogolâr Civic, in plui di presidencis e segretariis des fradaiis tiradis dentri.