SABIDE AI 17 DI OTUBAR 2015

Ai 17 di Otubar 2015, in chel inovâl che beromai di agns a son che le celebrin tant che “Zornade de Euroregjon”, coincidence casuâl des datis des firmis di chel famôs Tratât di Cjampfuarmit (17 di Otubar 1797), che al veve unît sot de stesse bandiere lis popolazions jenfri Alps e Adriatic, e di chê Declarazion di Vile Manin (17 di Otubar 2005), che e veve inviât il procès di formazion di une euroregjon parsore dai confins, i confradis dal Moviment Civic Culturâl Alpin-Adriatic dal Fogolâr Civic, sot presidence dal prof. Alberto Travain, a àn sotscrit, te capitâl dal Friûl Storic, un document di resonadis e intindiments sul pont des menacis ae autonomie regjonâl derivadis des leçs promovudis dal guvier talian che al è sù. Ve culì il test. “’Di tropis divisions disponial il Pape?’ al veve domandât, par ridi, une volte, Stalin. ‘Di tropis divisions disponial il Friûl Vignesie Julie?’ o varessin vuê di domandâsi ducj noaltris, citadins di un cjanton di Italie che gjeografie e storie lu àn simpri segnât tant che cûr de Europe e lis letaris ancje par “ristret di marimont”, crosere di popui fûr dal ordenari che la sô liende e il so non a rivochin dabon Iulius Caesar par pari famôs di une piçule patrie internazionâl, particolâr mismàs des diferencis incrosadis o ben madressudis su chel ôr nordorientâl dal Stivâl dilunc secui e milenis… Diferencis che nome par vie di chês vuê si pues pretindi il ricognossiment o il mantigniment di une autonomie e di une specialitât, colade la scuse di chê situazion speciâl di confin che e jere dai timps de Cortine di Fier. Ma trop i tignìno nô vuê pardabon a chês diferencis? Trop doprìno par vêr e in mût degn lis lenghis dal puest e metìno la firme par che lis insegnin ancje tes scuelis? A cui varessino di dî graciis se vuê o doman cualchidun a Rome al decidès che, viodût che in pratiche o sin compagns ore presint di ducj chei altris Talians, no vin plui dirit ni a specialitâts ni a autonomiis di sorte? ‘Nostra maxima culpa!’. Dal 1866, tal câs di Udin e Pordenon, e dal 1918, tal câs di Triest e Gurize, o vin fat di dut (ancje ben par fuarce) par integrâsi intun sisteme talian. Si sino integrâts juste par sparî? Onôr a chei pôcs che cun onestât si son batûts in culture e politiche par riscatâ la dignitât des nestris popolazions, des nestris lenghis, des nestris culturis! Pardabon pôcs in confront de sdrume de int e dai siei politics che a àn ancje tant ridût par daûr. E purpûr la autonomie vuê si rive a difindile ancjemò nome par resons di culture, che, in timp di globalizazion e di libar marcjât salvadi, il pont de economie, magari cussì no, al scjampe fûr simpri plui dal control des Istituzions dal teritori politichis-aministrativis. Lis resons di culture, però, bisugne savêlis gjestî! Trop varaie influît tal concret dute chê promozion istituzionâl des lenghis minoritariis su la cussience e la volontât de nestre int de regjon di fâsi sintî in culture e politiche? Trops di noaltris, in sinceritât, vuê si infogaressin tal câs che al vignìs scancelât vie chest Friûl Vignesie Julie culì? E trops si movaressino par difindi – o fâ tornâ a nassi – un Friûl par so cont o une Vignesie Julie o ben Litorâl cemût che si à voie? Alc al è clâr che nol à funzionât (o pûr al à funzionât ancje masse)! Un tant lu sa ben cui che a Rome o in altrò al menace lis nestris autonomiis e juste la esistence de nestre Regjon, cu la sigurece che, se une leç e ves di sdrumâlis o ben di sbassâlis, no saressin ribaltons di popul o almancul no tant che al sucedarès tai mastins Trentin e Tirol di Misdì! E ca no saressin ribaltons di popul par vie chest Friûl Vignesie Julie, dal 1963 incà, in passe 50 agns di Regjon Autonome che e à metût dongje dabon il restant di regjons storichis pôc o trop vieris, ni no si lu à promovût ni no chel no si à fat benvolê tant che rinovade “piçule patrie” a nordest dal Nordest italic, ma plui che altri nome par baracon di burocrazie, distributôr par mil trois di bêçs publics… Dal rest si lu à simpri vivût par un matrimoni sfuarçât e ledrôs fra particolârs che a àn suspiet un dal altri. Nuie di plui! Un cuarp cence anime! E un cuarp cence anime nol fâs front di nuie, par tant al è facil di scancelâlu! No si à tirât sù une comunitât morâl di regjon dal Friûl Vignesie Julie: une comunitât “forojuliane” fuarte (tant par dâi funzion gnove a un non biel atratîf doprât pai siei langobarts dal storic Pauli Diacul chel di Cividât che il prin sens di regjon aministrative a nordest dal Nordest al partìs di li), cussiente e braurose ereditarole e vuardiane di dutis lis esperiencis storichis, culturâls e politichis, dal teritori! Si àn invaloridis lis diferencis par mût di dî, ma no si à insegnât mighe no a compartîlis! Si àn pupiladis, sigûr, lis lenghis e lis identitâts particolârs, ma no si lis à par nuie cusidis intun spirt e tun orgoi di regjon che a unissin e a movin li che al ocor la int! No si à procurât o mighe no avonde di pastanâ une vision, une istorie, une liende comunis di identificâsi cun lidrîs saldis insot tal antîc e biei intidiments viers dal avignî! Cjo mo, i risultâts! Un tant dit par dî il vêr, il Moviment Civic Culturâl Alpin-Adriatic dal Fogolâr Civic al sigurarà poie morâl e ative di ce che al pues a dutis lis iniziativis tignudis par buinis su la difese e la promozion de autonomie dal Friûl Vignesie Julie dut intîr e di ogni sô singule part! Pupilìn lis nestris autonomiis di cui che al trate di scancelâlis o pleâlis dut a so pro!”. “Se Rome nus scancele al è parcè che no i fasìn pôre e no i fasin pôre ‘perché non siam popolo / perché siam divisi’!” al mutive il dean prof. Travain, taiant intor dal Friûl Vignesie Julie e dai siei teritoris storics un consonant mot gjavât fûr dal imni nazionâl talian. “Il dirit di esisti tant che comunitât al è ogni dì tes mans di ognidun di noaltris: se no si sintìn comunitât al sarà tant facil che mai vuê o doman scancelânus. Sintîsi comunitât al è un fat prin di dut culturâl, di tradizion o ben di formazion, che al devente ‘fat di cûr’ e cussì al môf cussiencis e placis. Su chest ducj cuancj o vevin e o varìn dal sigûr di pontâ!”

Precedente SABATO 17 OTTOBRE 2015 Successivo SABATO 5 DICEMBRE 2015