SABIDE AI 19 DI AVRÎL 2014

Se la storie furlane e à vût une famose Rivolte de Joibe Grasse e à vût ancje ben une cierte Barufe de Sabide Sante o de Sante Sabide, tant mancul famose ma no cence pês, che anzit de prime, par mût di dî, e je stade preambul. Un tant a Udin lu à memoreât il prof. Alberto Travain, dean dal Moviment Civic Culturâl Alpin-Adriatic dal Fogolâr Civic e dal Circul Universitari Furlan de Academie dal Friûl, te date di sabide ai 19 di Avrîl 2014, Sabide Sante, devant dal vieri Palaç de Brandis, de famee di un muart di rivuart di chê bataice particolâr, bande Lucinîs, dongje di Gurize, là che tal an 1508 chei de arme nobile de cavalarie mercenarie taliane si son cjatâts devant, juste un câs fûr dal ordenari, fantariis contadinis furlanis saldis sul pont di no cediur il pas. Alc al jere gambiât sui cjamps di bataie: il fant popolâr cun di fat al mostrave di no vê plui pôre compagn di une volte dai “siôrs” a cjaval. E un tant al varès ribaltât ancje propit la politiche istesse, che il popul in Friûl al varès pretindût e otignût un tant di autonomie origjinâl compartide dal bas midiant de sigûr contrastade istituzion dal ‘cuintriparlament’ de Contadinance. “Chel di Lucinîs salacor al è stât il prin scjassôs palesâsi di un mudament di mentalitât, di cjâf, des categoriis sotanis dai timps modernis documentât in tiere furlane di croniscj de epoche maraveâts e mighe no pôc” al à dit Travain che al à zontât che “il Fogolâr Civic, cul lâ indevant a componi il so libri ideâl su la identitât, scrit sul teritori e compagn sul lunari, centrât su datis, su lûcs, su figuris, vicendis e liendis, che al è prin avôt de sô continuade e curade vore, al à, duncje, volût tornâ a memoreâ chel fat storic a Udin, cûr dal Friûl, tant che tal 2008, tal aniversari dai siei 500 agns, par dismovi ator di chel l’interès in mieç de societât civîl e culturâl de regjon, calcolantlu par svee di cussiencis e brauris civichis che a àn di seisi intaiadis propit su chê rive dal Lusinç in chê lontane Sabide Sante dal 1508 co lis puaris fantariis di popul furlanis, a cost di centenârs di muarts, no àn pleât il cjâf nancje par ideis ma ur àn fat ben cuintri a lis supierbeosis cavalariis talianis. La storie de nestre cussience civiche e je, aduncje, passade pai cjamps di Lucinîs”. A chê memorie al à partecipât ancje il president provinciâl dal Istitût nazionâl talian dal Galon Turchin jenfri decorâts al valôr militâr, gjeom. Sergio Bertini, che puartant, pe ocasion, i simbui de fantarie, al à volût rindi testemoneance e onôr al ricuart di un moment rimarchevul de storie di chê arme te Europe des Alps insin l’Adriatic.