SABIDE AI 22 DI MARÇ 2014

E je mancjade Francesca De Marco, la increditade, anziane e mai strache presidente dal Coordenament Citadin dal Borc de Stazion di Udin, ma ancje ben figure di rivuart dentri dal Moviment Civic Culturâl Alpin-Adriatic dal Fogolâr Civic e dal Circul Universitari Furlan de Academie dal Friûl. Cun di fat, partint dal lôr sorestant, il prof. Alberto Travain, Fogolâr Civic e Academie dal Friûl, no par proforme e salamelec, a son pardabon mutulîts dal displasê par une pierdite di une tâl, cussì grivie mighe no dome pes fradaiis che a àn vût l’onôr di vêle, chê siore De Marco, dentri di socie, ancje ben cun incarghis di grât, e compagn no dome pai siei amîs, che a àn vût simpri mût di cercjâ la sô cordialitât, la sinceritât, la sô lealtât e la benevolence; une pierdite grivie mighe no sôl pal cuartîr benamât là che e jere nassude e che fin tal ultin al è stât centri dai siei pinsîrs, ma propit tant grivie, penzone che mai, pe citât dute cuante, pai citadins ducj cuancj, par dute la societât civîl, pai civiscj ducj cuancj udinês e furlans, vuarfins pardabon di une persone che, a ‘nd è pocjis in chei timps culì, e à dade prove di un tacament salt, atîf e splendit al ben de sô tiere e de sô int. “Francesca De Marco – al dîs Travain – e restarà par noaltris tant che une sorte di patrone, di tramontane, di riferiment, di spieli, come guide storiche di chel che al è stât il plui vivarôs, ferbint, atent e propositîf comitât civic di cuartîr di Udin citât dal secul in vore. Une femine che e veve mudât la sô vite privade intun at gjenerôs di dediche a la sô comunitât. Si mareave cuant che il so impegn e chel dal coordenament sot di jê a jerin stracapîts o, facil, doprâts, che si tratave di intindiments sclets a favôr di une integrazion che e fos rispietose tant di chei che a rivin che de tradizion dal puest che ju ricêf, di une sigurece che no fos parvence, di un colaborâ tra citadins e sorestants che al fos dabon concret e sancîr… Sul moment di un cumiât dalgjenar no bastin peraulis, no si ‘nt cjatin, par onorâ un personaç di une tâl, nostran, ca di Udin: par onorâlu al è juste sôl di cjapâlu di spieli e condurâ tal impegn. ‘Duri al pezzo! Mai molâ!’ al jere chel il sproc di Francesca. Indevant, inalore, in particolâr i amîs dal Coordenament Citadin dal Borc de Stazion di Udin: inmò e simpri indevant, ducj insiemit, in ricuart de Cjarissime nestre!”.