SABIDE AI 28 DI FEVRÂR 2015

Un incuintri gaiôs e cordiâl cul Sindic di Udin, prof. Furio Honsell, al à marcât, sabide ai 28 di Fevrâr 2015, alì dal Bar Amabarabà di Marcjât Vieri, la scree dal prin bossul rionâl dal “Censiment di Popul dai Mâi di Cumò par une Costituzion furlane dai valôrs locâi e universâi” inviulât dal Moviment Civic Culturâl Alpin-Adriatic dal Fogolâr Civic in cunvigne particolâr cul Club Unesco di Udin. “Une ocasion valide par ducj di fâ un esam di cussience sul nestri contribût a pro di un ben comun, parsore di principis ‘condominiâi’” al à dit il Sorestant riclamant ancje il sproc famôs di John Fitzgerald Kennedy “no sta domandâti ce che il to Paîs al puedi fâ par te ma ben ce che tu tu puedis fâ di bon pal to Paîs”. “O procurìn, a dî il vêr, plui che altri di puartâ indevant la democrazie e di difindile tant che procediment, plui che come contignût: plui come argagn che tant che prospetive di une civiltât” al à mutivât Honsell rignuvint la sô stime pe fradaie promotore e fasint compliments al pitôr e senografist udinês, prof. Michele Galliussi, che al à fat i bossui artistics pe particolâr consultazion sociâl-culturâl, valoriâl-identitarie, dal Fogolâr Civic, bossui a torat cun chê di “tradusi in forme la idee di un cjapâ cussience in progrès di se come societât, idee figurade midiant di un graduâl meti a fûc di cierts riferiments di architeturis dal teritori”. Ve mo inalore che il bossul-torate pal “cuintîr” storic di Marcjât Vieri a Udin si à ispirât al trat dal antîc Portonat di Cividât didentri o Sant Bartolomiu o pûr di Sant Antoni, che cumò si disii Puarte Manin, jentrade orientâl de citadele di une volte. Tal so intervent, il conseîr movimentâl pal Cuintîr di Marcjât Vieri, gjeom. Sergio Bertini, ancje president provinciâl di Udin dal Istitût nazionâl talian dal Galon Turchin, al à confermât, in presince dal Sindic, il so rignuvît impegn a lavorâ sul teritori cun chê di rionzi tal dì di vuê une vite sociâl di cunvigne e di fevelâsi tra la int, condizion valide pal increment dal consorzi civîl. Presinte ancje la bandiere di sezion dal Cuintîr. Il Sindic, ricevût di une biele delegazion dal Fogolâr Civic menade dal so dean prof. Alberto Travain, al à vût par man dal “cancelîr” de fradaie, siore Jole Deana, l’anuari sociâl 2014, document di testemoneance de ativitât penzone e ferbinte dal Moviment scancelade in pratiche de plui part dai gjornâi dal puest. Te compagnie a son capitâts dongje ancje i conseîrs comunâi av. Paolo Perozzo e prof. Natale Zaccuri. “O vin di sei plui grancj des nestris miseriis cence che si segnisi intor di nô. Tra mancjâ di riferiments e vênt ma no sei a la altece la diference e je grande che mai. Ve mo alore un cirî volontari di scandaiâ e di inviulâ une comugne morâl, intun timp li che dut al clope par vie che si tegnilu dut relatîf ancje tant in plui de garanzie juste de libertât personâl. Ve une iniziative che in dì di vuê e somee pardabon une opare utile, ancje ben partint di une crosere antighe di Europe tant che al è il Friûl che la atualitât lu à ridot su tancj fronts a une perifarie: une ricercje, un scandai di identitât sui valôrs personâi di cusî, di tradusiju intun consecuent, armoniôs progjet di mosaic; un sium di no mai rinunziâ par no sbrissâ jù cence remission intun sfondar dal sintiment singolâr e plurâl”: cun chestis peraulis il dean Travain al à insuazade la scree di chel bossul, ospit dal ustîr udinês nomenât sâr Andrea Sabbadini, vecjo colaborant di chel Fogolâr, scree formalizade cul Sindic che al à imbusât juste ben la so schede di consultazion, che dut si è sierât cuntun brindis furlanon di popul che mai nol mancje. Des rapresentancis de Clape a jerin i conseîrs movimentâi gjeom. Sergio Bertini, siore Marisa Celotti, siore Jole Deana, dot. Carlo Alberto Lenoci, siore Antonietta Monzo Menossi, dot.e Maria Luisa Ranzato, tenôr Gianfranco Savorgnan. Gradiment particolâr e à vût ancje la presince di dôs promotoris storichis dal Fogolâr Civic: lis professoris Gianna Bianchi e Vittoria Sacchetti.