SABIDE AI 28 DI JUGN 2014

“Il fat che vuê la famee di Asburc, par memoreâ i cent agns de vuate nazionalistiche disgraciade di Sarajevo, che e à tirât dentri il Continent Vieri e ancje il rest dal mont intune tremende vuere ‘fra fradis’, preambul di altris divisions ancjemò e di macilis di popui, a vedin sielzût dabon il santuari di Mont Sante dal Lussari, culì tal nestri Friûl Vignesie Julie, santuari intitulât a une Madone proclamade Regjine de Europe su la crosere des gjernaziis latinis, slavis e gjermanichis, al rapresente in fat di culture un pont di onôr pe regjon nostrane e il ricognossiment confermât di une funzion dal teritori che no pues cjatâsi costrete de viodude ristrete di un Stât nazionâl”: chel ca il prin coment dal dean dal Moviment Civic Culturâl Alpin-Adriatic dal Fogolâr Civic e dal Circul Universitari Furlan de Academie dal Friûl, prof. Alberto Travain, che, tal inovâl che al è stât sassinât tal 1914 Francesc Ferdinant vâl a dî il princip ereditari de Austrie-Ongjarie cu la sô femine, al è lât sù, ai 28 di Jugn 2014, in piche al Lussari cuntune delegazion des sociis cun tant di bandiere di Aquilee, par jessi presint a lis memoreazions inmaneadis dal Ordin di Sant Zorç de Cjase di Asburc e Lorene. “Pai centenaris, cumò, de Prime Vuere – al à dit Travain par prionte -, in plui sigûr di onorâ lis vitimis e condanâ i ‘becjârs’ di chel malandret maçalizi, chest nestri moviment, cun lidrîs localistichis e europeistichis, miôr ancjemò euroregjonalistichis di clare stampe, che al rimonte indaûr tes liendis di mil significâts in cont di un Friûl trassunt dal Continent e di une Aquilee calcolade di ‘madre e reina’, par dîle cul ‘Attila’ di Verdi, di tantis nazions de Mittel-Europe, nol pues mancjâ di sei consecuent tal pandi – mutatis mutandis – in dì di vuê une cunvigne culturâl plui salde cu la ‘cause asburgjiche’, a pro di un Stât sorenazionâl frontât su principis di unitât te varietât, oltri che di famose, mai dismenteade, onestât di guvier, anticipazion di un ideâl di union di popui che il progjet al è stât rionzût in Europe e cun dificoltâts sôl che dopo tocjât il font di dôs vueris mondiâls orendis”. In chê ocasion li la delegazion dal Fogolâr Civic e à ancje incuintrât l’arciduche Zorç di Asburc e Lorene, rivât pe comemorazion in rapresentance de Cjase di Austrie. Chê delegazion, formade dal dean prof. Travain, dal vessilîr gjenerâl sâr Gianfranco Passone e dai colaborants prof.e Anna Buliani, sâr Giuseppe Capoluongo e siore Rosalba Meneghini, e à screât ben propit in chê ocasion li il “façolet” rimodernât simbul dal Moviment, curât di chê siore Meneghini istesse, benemerite confezioniere de Organizazion.