SABIDE AI 5 DI DICEMBAR 2015

“Su chescj cuei, su chescj plans, tantis voltis duchis di Austrie e conts di Gurize a saverin sfrutâ lis parts sanganosis che a dividevin il paîs par slungjâ la lôr çate; ma e rivà la zornade po là che i Furlans si meterin adun e i cuei de vicine Feagne a saludarin fiestôs lis bandieris di Francesc Savorgnan incoronadis di vitorie”. Cussì al veve fevelât a Sant Denêl, tal 1911, il grant studiôs Pier Silverio Leicht, rivocant il sens di un dai moments plui fûr dal ordenari de storie dal Friûl. Sabide ai 5 di Dicembar 2015, di iniziative dal Moviment Civic Culturâl Alpin-Adriatic dal Fogolâr Civic e dal Circul Universitari Furlan de Academie dal Friûl, graciant dal cortês acet proprietât e parochie dal puest e in cunvigne in particolâr cu la Federazion provinciâl udinese dal Istitût nazionâl talian dal Galon Turchin jenfri decorâts al valôr militâr, il Club Unesco di Udin e la Confraternite metropolitane dal Crist, te frazion di Madrîs di Feagne, alì de gleseute campagnole de Madone de Taviele, e je stade une celebrazion religjose e secolâr par ricuart dai muarts di dutis dôs lis parts te impuartante e purpûr dismenteade bataie stade in chei cjamps za fa 650 agns, “bataie che e veve significât la liberazion dal Friûl di un dai tancj invasôrs de sô storie e che se, di une bande, e jere stade une dimostrazion di pofardie, di saldece e di union de regjon, di chê altre, si veve sigûr produsude par rignuvît drame de vuere civîl” al à vût iniment te presentazion il prof. Alberto Travain, dean dal Fogolâr Civic e de Academie dal Friûl. “Une ocasion valide par resonâ, duncje, culturalmentri suntune storie di une volte, cumò e doman dal nestri jessi comunitât di teritori su chest cjanton o crosere di mont! E dut – al à zontât il sorecjâf des dôs clapis promotoris – cun spirt di superâ divisions e scuintris che a àn segnât seculorums di storie mittel-europeane e in particolâr chel moment decisîf alì che la Austrie e veve tacât a vignî indevant tirant sot lis regjons alpinis ancje ben in dam dal antigon Patriarcjât di Aquilee, prin stamp di unitât dai popui di chel pivot internazionâl, cûr de Europe simpri stât confin e cerniere di passions. ‘Austrie’ nome dopo e veve volût dî imperi plurietnic, civîl, ordenât, memorie di avignî pe Europe di vuê! Za in chê volte, però, une fazion furlane e podeve viodi in cualchi maniere te bandiere austriache la sperance di un riscat cuintri di une patrie locâl ‘marilastre’, pleade a interès parimentri o inmò plui ‘forescj’ di no mai sopuartâju. Ve parcè che, scomençant la cerimonie, dongje des rosis zalis e turchinis aquileiesis, just presentîr pai difensôrs vitoriôs dal Friûl di chê volte, alì de imagjine de Madone patrone di chê campagne si à decidût di poiâ ancje une dediche fluride in blanc e ros, i colôrs austriacs e di chei che tai secui par cualchi reson a àn viodût te Austrie un pussibil cuintrialtâr ai locâi ‘malans’”. Il discors memoriâl, fat in lenghe furlane dal dean prof. Travain, al à zovât a rivocâ in struc une vicende locâl e internazionâl, fate di personis, congreghis, potencis, dirits e interès di tancj e di pôcs. Ve culì il bocon centrâl di chel plait. “’Conflictae fuerunt omnes sub Faganea’: tal plen dal istât dal 1365, ve cumò sîscent e cincuante agns, l’esercit di un Friûl unît la plui part par pôre de solite invasion al frontà vitoriôs tai cjamps sot Feagne l’assalt mastin di sietcent cavalîrs austriacs comandâts di un nobil furlan. Duncje, di une bande, un difindi la patrie; di chê altre invezit, un rivoltâsi cuintri di une tignude di marastre, di scugnî parfin clamâ aiûts di fûr. Une naine za stade e ripetude mil voltis te storie furlane, taliane e de Europe. Par ca di ca, un principât, chel di Aquilee, robe di glesie, sot di un parlament ma restât cence princip, par tant rimpinât, sbarlufît, dut intor di un vicjari ferbint cjatât fûr te persone di Checo Seorgnan; par là di là invezit, un invasôr tramontan poiât di un scjap di maiorents de regjon direzûts di chel cjaviestri di Pertolt di Spilimberc, contrârs di une curie aquileiese in balie tantis voltis di parincj e coparis di une rie cence fin di patriarcjis forescj. Dut chest te suaze di un cuadri complicât di aleancis e di svilups de gjeografie politiche de bande jenfri Alps e Adriatic dai timps de Medietât tarde. Une zovine potence austriache in vene di slargjâsi a misdì viers bonât e vignive a trussâsi par vee il comant di Carintie e Friûl intor dal Patriarcjât di Aquilee carampan. Co la Austrie e tacà a meti il nâs tai afârs de Alte Italie di jevât, si cjatà subit cuintri il plui grues potentât di tiereferme vâl a dî la siorie cararese di Padue che e veve contrarie di se Vignesie che e jere gjelose! Ve che inalore il Moviment Civic Culturâl Alpin-Adriatic dal Fogolâr Civic, che a son trente agns scuasit che al bat su lis tradizions di difese comune des popolazions de Europe aquileiese e che, sot de fieste di Sante Barbare, patrone storiche di defension civiche tra rive adriatiche e cjadene alpine, al use ogni an di memoreâ un fat politic-militâr che al vedi dabon in chel un inovâl di scjas, chest an culì al à destinât di ricuardâ ducj chei che a àn lotât e ducj chei che a son muarts sîscent e cincuante agns indaûr sul cjamp di bataie di Feagne e un tant sigûr no par magnificâ une vuere o pûr une des parts in contese, ma ben par dâ un sens in zornade di vuê, un util presint, a memoriis di passion, sacrificis e patiments indaûr tal timp ma che no meretin di colâ in dismentie. Ca un monitori alore indreçât ai invasôrs di ogni ete, ai prepotents, ai ambizionôs in dam de comunitât, ma ancje ben dal ciert a chês patriis fatis baracon di interès di pôcs o di fûr presentâts par braure locâl. Si che duncje, chê biele gleseute di Madone de Taviele, tes campagnis di Feagne, testemone suturne di chê vitorie furlane grande ma ancje de tragjedie di une vuere civîl, di cumò indevant, dopo tant cidin, che e puedin dabon clamâ un popul a pensâi sore a ce che al è stât, a ce che al è e che al sarà de sô storie in cont de travuardie miôr de armonie de sô vite civîl. E di memoriâl di lotis passadis chê capele alì che e puedi proponisi prest par riclam di une rignuvide amicizie jenfri Austriacs e Furlans e transconfinarie in gjenar alpine-adriatiche, cun rispiet des libertâts e identitâts specifichis e ben tal cuadri continentâl di une unitât politiche e inmò prin morâl che e pâr pardabon ore presint lontane!”. La Sante Messe le à dite il capelan sociâl dal Fogolâr Civic, il benemerit pre Tarcisio Bordignon, cun preieris e testemoneancis tai lengaçs storics de regjon e des parts in lote in chel lontan 1365. Te predicje che predi di Udin tant nomenât si à fermât in particolâr su la impuartance de lezion de Storie par un vuê alì che si rionç il cancar de vuere, disgracie umane che bisugne gjavâi ogni scuse pussibil: “vinci il mâl cul ben” al scriveve Sant Pauli ai siei timps. Significative e atuâl une vore e je stade la preiere dal dean prof. Travain “al Diu dai nestris popui, in chês lenghis furlane e todescje che 650 agns indaûr si son incrosadis culì tal disio di une tremende vuere fratricide tra gjernaziis fiis de Mari Aquilee“: “Pe pâs jenfri dai nestris popui, pe unitât des nestris tieris e par une patrie europeane miôr di chê che e je cumò. / Für den Frieden unter unseren Völkern, für die Einheit unserer Ländern und eine bessere europäische Heimat“. Daûr de Comunion, a bandieris pletis – che a jerin i standarts memoriâi di ducj i “cuintîrs“ militârs dal Friûl Storic e il vessil po sigûr di Aquilee –, al è stât il presentîr di popul pai defonts in chel antîc drame tal cûr de Europe, che al è stât let l’ecumenic “Avôt dal Fogolâr Civic ai muarts pe patrie te Europe aquileiese”, preiere secolâr o interreligjose cun chê di ricuardâ ducj chei copâts fûr di ore che al è mont che a àn difindude la lôr patrie tra Danau e Adriatic, che il lôr sanc, misturât cu la aghe nete des monts alpinis, al dismonte viers Mediterani e Mâr Neri converzint in ideâl li de antighe citât di Troie, primarole patrie di origjin di tantis nazions de Mittel-Europe, scomençant de Mari Aquilee: “Lum nestre di vite, fâs che tes venis de nestre memorie mai no si sfanti il ricuart di chel sanc nocent e gloriôs spandût jù pai secui in tantis Termopilis su cheste crosere antighe di Europe che e ten par sô mari Aquilee regjine, nobil umôr tornât indaûr a Mediterani e Mâr Neri, grim de sô liende prime, dutune cun aghis che a smontin rampidis di crets vuardiâts des stelis alpinis”. Po a son stât i intervents di rapresentance. Il sindic di Feagne, Daniele Chiarvesio, presint a chê iniziative, le à ben lustrade pal so intent di tornâ a tirâ fûr une storie in pratiche dismenteade e cun sinceritât si à zontât tal ricuart di ducj chei che tai secui a àn batût e a àn sacrificât pe libertât e pal ben dal Friûl, preseant cetant chel simbolic lâ a meti dongje i colôrs furlans e austriacs juste intun moment li che il spirt di Europe al clope che mai. Il president provinciâl di Udin dal Istitût nazionâl talian dal Galon Turchin, gjeom. Sergio Bertini, al à proponût po daspò une ovazion pai muarts di chê bataie cu la intenzion di une “decorazion morâl” sul cjamp, al valôr militâr, proferide, a 650 agns di chê vuere, di une samblee popolâr dade dongje te capelute locâl di campagne. Di culture de pâs e à fevelât la prof.e Renata Capria D’Aronco, deane dal Club Unesco di Udin, che e à incuadrât i avôts di union austriache-furlane e mittel-europeane pandûts dal prof. Travain, delegât di chê clape par formazion civiche e citadinance ative, tant che dentri in plen tai prospets de corint “Desene Internazionâl pal Svicinament des Culturis” lumade de agjenzie ONU pal decenâl 2013-2022. Daûr di jê al à fevelât il priôr de Confraternite dal Crist di Udin, Giuseppe Capoluongo, che, pe sô specifiche funzion di promozion de culture religjose locâl, al à invidât i convignûts a dî une preiere par bon dai defonts, ricuardant in particolâr il drame di un popul tant che chel furlan, batût di milenis di invasions e pestadicis. L’academic di Cjaudistrie prof. David Bizjak, referent de rame slovene dal Fogolâr Civic, al à proponude po daspò une leture sugjestive bilengâl slovene-furlane de poesie “Vecerne sence” / “Ombrenis de sere” di Alojz Gradnik, grant autôr dal Cuei, li che il critic di art roman Alfredo Barbagallo, agradint il spirt internazionâl de iniziative e la dignitât storiche dal popul furlan, al à tirade prin di dut la atenzion su la impuartance di invalorî lûcs tant che chel di Madone de Taviele, tignût benon e che al mertarès destinât – al à dit – ancje ben a ocasions e incontris sociâi culturâi. Po al à fevelât il cultôr di storie locâl Maurizio Di Fant, colaboradôr valent su chê iniziative e dissendent di chel che, ai timps de dominazion austriache, intune aste al veve comprade chê gleseute passade par dutis lis baraondis stadis tra Siet e Votcent: ingropât di just, al à rivocât i siei leams di famee cu la liende di chê capelute e batût su la utilitât di un tornâ a tirâ fûr la storie furlane e aquileiese, incrôs fûr dal ordenari di principis e câs culturâi, linguistics, civîi e religjôs. Il dean Travain al à puartât in ultin i salûts e i rispiets dal Consolât Onorari di Austrie in Friûl Vignesie Julie e dal Comun di Udin, “capitâl dal Friûl”. La cerimonie, tant partecipade, cuntun public in sorte di int di culture, academics, insegnants, studiôs, cultôrs di storie e culture dal puest, citadins, si à sierât cul famôs cjant de Madone “Ave o Vergjine, us saludi” e riverence di bandieris viers la imagjin de “Madone de Taviele”, patrone di chês campagnis cussì imbombis di memoriis. Su la ocasion a son stâts ancje il plevan di li, pre Giorgio Fabro, e il vicjari foraniâl di Feagne, bons. Adriano Caneva. La manifestazion si incuadre tal progjet sociâl culturâl “Stele Alpine”, creât e svilupât des fradaiis promotoris dal avigniment e destinât a tornâ a tirâ fûr lis plui lontanis memoriis di difese de patrie de bande jenfri Alps e Adriatic, iniziative valide no dome pal argoment e pal inovâl ma ancje ben pe nature libare e liberâl dal so proponisi, costum che a son aromai un 30 agns dal moviment dal Fogolâr Civic, motôr di culture civiche che al ven des tradizions chês miôr dal Friûl e de Mittel-Europe “aquileiese”.