SABIDE AI 6 DI JUGN 2015

No jerin mighe metûts di acuardi e pûr si son cjatâts ai 6 di Jugn tal domo di Udin, di Udinês patocs, li de sapulture dal Patriarcje Beltram, che cun chel la citât e je in debit di dut, scomençant de sô funzion storiche di capitâl: citadins; confradis dal Fogolâr Civic guidâts dal prof. Alberto Travain; i Siôrs di Prampar, dal ram “lealistic”, che i lôr erêts inmò a puartin tal non il ricuart de antighe fedeltât al princip copât in chê istesse dì dal 1350 intun complot di potents dai timps. Sintût, antigon e ben degn di menzon stant il so ripetisi compagn ogni an, ve mo alore il gjest familiâr dal prof. Pietro Enrico Maria Bertrando di Prampero, famôs academic e sorecjâf vuê de sô cjasade, che al à rinovât di puartâ un garoful simbolic alì che al è sapulît il vescul sassinât. Spontanis si àn ripetûts i presints tradizionâi di flôrs e la devozion di tocjâ lis rosis alì de urne dal Patriarcje che i disin di fat la “benedizion des rosis”, costum citadin vieron che daûr di chel tes fameis mai nol mancje picjât tal mûr il garoful memoriâl dal Patriarcje benefatôr, protezion dal fogolâr. E cinc garofui tant che i cinc cuintîrs udinês e furlans, che cussì il bon Beltram, “Artûr Aquileiês”, al veve organizade la difese de patrie su la crosere dal Continent Vieri, a son stât poiâts, pe ocasion, dapît de arcje dal princip-vescul par cont dal Fogolâr Civic che chês memoriis e chei valôrs civîi alì al cîr di puartâju indevant, gjenerôs, in zornade di vuê di passe un cuart di secul. Il prof. Travain e la dot.e Marisanta di Prampero de Carvalho, capitâts in domo, ducj i doi a àn ricuardade la lungje bataie sociâl-culturâl e istituzionâl combatude insiemit su fronts diferents par rivâ tal 2001 al ricognossiment uficiâl di Beltram par patron secolâr udinês, lidrîs che e unìs la comunitât civiche passant parsore di ogni diference in fat di crodincis. Ducj i doi i àn tignût di ancje meti dongje impegn e sacrifici a pro di une idee di Friûl ordenât, bondançôs, studiât e sigûr, cu la riunde “foreste”, francese, ocitane, di chel mai dismenteât sorestant de Patrie dal Friûl: un merit e un insegnament sigûr no di pôc.

Precedente SABATO 6 GIUGNO 2015 Successivo GIOVEDÌ 18 GIUGNO 2015