SABIDE AL 1N DI NOVEMBAR 2014

“Sostegn pes ‘vitimis’ de provisorietât didatiche colpe carencis des Istituzions e sburt a meti man”: chest il cantin tirât fûr dal gnûf document sui problemis de Scuele taliane instradât de Furlanie des fradaiis civistichis Fogolâr Civic e Academie dal Friûl, firmât te capitâl furlane al 1n di Novembar 2014 e indreçât ai Presidents di Republiche e Consei, al Ministri de Scuele e al Prefet di Udin e, compagn, destinât, di informative, a partîts, sindacâts e gjornâi. Ve culì il test. “Preseâts Sorestants, mostradis a ripetizion no buinis di compilâ cun sisteme lis graduatoriis di suplence inzornadis prime che al scomenci l’an scolastic e costretis cussì a nomenâ par intant ogni an insegnants timp o tart po cambiâts cun titulâts di dirit gjavâts fûr di graduatoriis gnovis formadis tardis, lis Istituzions statâls a van dilunc a dineâur ai scuelârs des scuelis publichis chê continuazion didatiche ricognossude pardut di fonde significative par une valide istruzion de zoventût, sburtant par ledrôs, di chê strade, viers une sielte di scuele privade. Un tant, ce vergogne, al sucêt ancjemò in Friûl Vignesie Julie e in dute la Italie, sigûr no cence che a sedin ben protestis ferbintis, ma cence mai che un at di guvier, cul ameti che lis Istituzions di chê bande li a son dispès che a mancjin, nol vedi dabon comandât di confermâ par dut l’an chei suplents cjolts sù, sante scugne, sul tacâ dal an scolastic co lis graduatoriis chês rignuvidis ancjemò no son. Tant che azion morâl e culturâl dovude e par estreme cetant civîl interpretazion di un disdegn fra la int, di une dissension slargjade e cressint viers di ciertis falopis des Istituzions, che, judant tanton a slontanâ il popul, a discreditin simpri plui, magari cussì no, di fat, i Podês Publics clamâts in concret a sigurâ il ben comun, ca cumò un scjap di citadins e rapresentants sociâi, dât dongje dal Moviment Civic Culturâl Alpin-Adriatic dal Fogolâr Civic e dal Circul Universitari Furlan de Academie dal Friûl intune regjon cjantonut di Italie ma cûr de Europe, Ur destine, a lis Lôr direzions, une espression vive di sostegn pes ‘vitimis’ – prin di dut lis comunitâts des scuelis e dai teritoris, ma ancje ben sigûr la funzion di insegnament – di une provisorietât didatiche colpe mancjance des Istituzions che no si pues plui, che no à ni reson ni mani e pursì si pare daûr regulis di leçs che però no discjolin la Sorestanzie dai siei dovês superiôrs di pupilance dal preminent interès di comunitât. ‘Il re al è crot!’: justificazions no son, ma ben a risultin imprescj legâi, invezit, valits par fâ front a chei cierts discomuts che a intachin in lunc e in larc la ufierte formative publiche de Scuele taliane. A Lôr, Sorestants, ognidun sul so, cui segnalant cui fasint, che Ur tocji, inalore, la cjame e l’onôr di vualmâju. Cun fiducie, che no à di mancjâ, e cun civic rispiet”.