VINARS AI 11 DI AVRÎL 2014

“Preseadis Autoritâts, il Moviment Civic Culturâl Alpin-Adriatic dal Fogolâr Civic e il Circul Universitari Furlan de Academie dal Friûl, dutune cul Coordenament Citadin dal Borc de Stazion di Udin, dât dongje valit e confasint spieli de societât civîl dal puest, a sburtin, cun cheste letare, i sorestants dal Comun di Udin a proviodi di meti man par che no si sfanti tal cjâf de int il ricuart de benemerite citadine Francesca De Marco, la ‘Siore dal Borc de Stazion’, mai strache ativiste civiche de capitâl dal Friûl Storic, nassude ai 8 di Avost 1931 e muarte simpri in chê citât ai 22 di Març 2014, che al so funerâl il Sindic in fasse, compagnât di ecezion ma di just dal Confenon de Citât e di varie e preseade rapresentance dal cuarp sociâl, culturâl e politic dal teritori, i à fat onôrs agradîts e sintûts. Partide di frute, di vivandiere dai depuartâts passâts pe stazion feroviarie di Udin te Ultime Vuere e deventade santule convinte e pioniere di une idee di cuartîr citadin furlan dal Doi mil che e podès compagnâ benon tradizion e mondializazion: ve cui che e je stade Francesca De Marco, stombli e dean dal Coordenament Citadin dal Borc de Stazion di Udin di no podêle mai dismenteâ, figure impuartante dal Moviment Civic Culturâl Alpin-Adriatic dal Fogolâr Civic e dal Circul Universitari Furlan de Academie dal Friûl, promotore de Bancje dal Timp locâl e ancje fondadore de Universitât “delle LiberEtà”, sostignidore de Scuele ‘Ricami & Legami’ di Udin e consûr de Fradaie dal Crist, persone di rivuart par sorestants e popul, ‘citadine esemplâr, model di citadinance ative’ cemût che di reson le à definide il Sindic. Chei che a firmin ca sot a clamin, partant, i sorestants dal Comun di Udin a batiâ cul non di Francesca De Marco (1931†2014), civiste udinese, almancul la jeche taronde dal Plaçâl de Republiche, che di li si viodin tant la Stazion che il Municipi, simbui di borc e citât, di cuartîr e Comun, di chês dôs misuris dal vivi civîl e sociâl che jê e saveve metilis dongje e fâlis contratâ cun sens civic. Sperant te plui largje cunvigne e te capacitât di superâ eventuâi pidiments burocratics, si spiete sigûr un riscuintri a pro”. Ve, duncje, culì un dai proponiments par no che al clopi il ricuart de figure e de vore de citadine Francesca De Marco, proponiments presentâts sot dal trentesim de muart a Sindic e Comun di une variade rapresentance de societât civiche locâl, partint dal Fogolâr Civic, cui siei cinc “cuintîrs” e lis sôs dôs sezions foroiuliane e slovene litoranie, insin a la Academie dal Friûl e al Coordenament citadin dal Borc de Stazion; de federazion provinciâl dal Istitût nazionâl talian dal Galon Turchin jenfri decorâts al valôr militâr al Club UNESCO di Udin; de Fradaie dal Crist a la Scuele “Ricami & Legami” e a “Progetto Tempo”; jenfri di chei che a àn metude la firme, al è stât ancje l’innomenât pre Tarcisio Bordignon, promotôr famôs dal judâsi un cul altri framieç dal popul, che la De Marco i tignive un grum. Une altre propueste, vignude de celebre ricamadore Antonietta Monzo Menossi, amie de muarte, di intestâi une sale o pûr une aule alì de Scuele Dante Alighieri, là che la De Marco e veve fatis lis elementârs e in chescj ultins dîs agns e veve cirût di animâ l’ambient cun iniziativis par fâ madressi un spirt civic dal bas, ricreât partint dal concret e dal positîf, dal locâl al globâl, e je stade ancje chê daurman indreçade al Sindic e a la Direzion dal III Istitût scolastic comprensîf citadin.