VINARS AI 15 DI ZENÂR 2016

Vinars ai 15 di Zenâr 2016, il moviment civic culturâl alpin-adriatic dal Fogolâr Civic, sot dal prof. Alberto Travain, si à cjatât li dal storic Bar Zecchini di Place dai Grans a Udin pe prime cunvigne sociâl dal an, che si à “proclamade”, di tradizion, e tamesade di gnûf la costituzion de clape.

COSTITUZION MORÂL DAL “FOGOLÂR CIVIC”
Riforme 2005 – Version in lenghe furlane
Udin, Canoniche di Sant Cristoful, ai 11 di Dicembar 2005.

CONDIVIDINT la esperience storiche e lis prospetivis di promozion de culture civiche rapresentadis de iniziative dal dot. Albert Travain di Udin;
DECLARANT il Ben de Persone e il rispiet de Nature tant che i fins superiôrs di seguî e il dirit naturâl come riferiment morâl primari;
VIODINT tes comunancis solidâls che no sedin contrariis dai fins declarâts une necessitât difensive e afetive de Persone;
SIELZINT la comunitât publiche teritoriâl, no formade daûr des carateristichis condizions de int ma suntune adesion a la identitât locâl etiche e culturâl, li che e je tal rispiet de Persone e de Nature, come la miôr forme di coordenament de popolazion;
PROFESSANT il principi di sussidiaritât cressint come prospetive par un rignuviment des identitâts coletivis;
MARCANT il principi de sovranitât popolâr, pûr leât cul rispiet de Persone e de Nature, come fondamentâl di ogni comunitât;
TIGNINT pal primât dal interès de comunitât su chel dal privât tai câs di intac dal Ben comun;
si che
CALCOLANT di no podê fâ di mancul dal valôr des comunitâts locâls come çoc e prin bastion di un possibil convivi civîl;
PROCLAMANT, parsore di ogni privade diference, il primât di un impegn di fradaie vicendevul, culturâl e tai fats, di ducj chei che a vivin e che a lavorin te stesse realtât locâl;
LAMPANT tes tradizions civîls e morâls des comunitâts locâls il principi di cusidure des societâts che lis caraterizin, tal rispiet e parsore di ogni privade diference;
TIGNINT chê di ricuperâ e di rimodernâ i valôrs universâi che a son tes tradizions di comunitât locâls par azions necessariis di interès public cul intent di tornâ a inlidrisâju ben e che la int ju rispieti;
SOSTIGNINT il rinovâsi di un costum civîl e morâl de comunitât locâl che al sedi in stât di metisi, tal so zîr, di riferiment te vite sociâl di no podêlu taiâ;
VIODINT il destin de regjon alpine-adriatiche intun zîr viert di rapuarts là che si confermi une sô centralitât civîl e morâl, rigjitât di Aquilee;
POIANT su ogni nivel, come principi, i dirits morâi di autodecision, partecipazion e mobilitazion cuintri de tiranie, di ogni comunitât;
FORMANT come grop informâl une comunance solidâl sul imprin nomenade Moviment Civic Furlan “Academie dal Friûl” (Pro Academie dal Friûl: Pro AdF) o “Fogolâr Civic”, vuê deventade moviment civic Alpin-Adriatic cun denominazion tes lenghis des sôs partisions locâls, fate sù sul model de famee, base e spieli tradizionâl di comunitât, alì che di un cep che al è il so promotôr, dot. Albert Travain, a vegnin dai rams che si riferissin a siei fiduciaris e che a metin dongje int simpatizante dal moviment no daûr di une origjin ma dal teritori alì che e je a stâ;
NOALTRIS
SI RICOGNOSSÌN
part in plen di une aleance culturâl e di program che e puarti indevant un spirt civic di difese e di miorament de societât, civîl e morâl, insedât sui valôrs de Persone e de Nature, di tirâju fûr de tradizion locâl e di rinovâju: une union morâl, une companie di amîs, implantade sui principis scrits parsore, promovude e guidade dal dot. Albert Travain e cun simbul, dongje dal garoful storic di Beât Beltram e dai Savorgnans, erois di popul de Furlanie, embleme origjinari dal moviment, il tricolôr civic blu, blanc e zâl, riclam al popul di Aquilee, prime metropul alpine-adriatiche;
SI PROMETÌN
spirt di fradaie e colaborazion par rivâ i fins comuns e pe vite in gjenar.

Precedente VENERDÌ 15 GENNAIO 2016 Successivo LUNEDÌ 18 GENNAIO 2016