VINARS AI 18 DI SETEMBAR 2015

Tant dûr che mai l’atac dal dean dal Circul Universitari Furlan de Academie dal Friûl e dal Moviment Civic Culturâl Alpin-Adriatic dal Fogolâr Civic, prof. Alberto Travain, in cont des frescjis denunciis di bularie segnaladis de stampe udinese cun particolâr riferiment aes scuelis. “Poie plene e ferbinte a chê mari che cun fiât e sens civic grancj e no mighe usuâi e à volût a palês denunciâ lis situazions di insigurece o ben di pericul là che i nestris students a puedin cjatâsi, colpe prin di dut mancjance o carence di une autoritât fuarte, garanzie di ben comun partint des aulis di scuele. Ce ‘Buona Scuola’? Ce riformis, se no si met man a un principi seri di restaur di une autoritât pardabon pupilade e pupiladore di cui che al frecuente tes nestris scuelis? Cjacaris talianotis! Che lis scuelis publichis furlanis – tant che, facil, tantis privadis – a platin la veretât in cont de situazion dal ordin lôr interni, di garanziis, serietât, sigurece dai lôr usazîrs al pâr fat di logjiche, vint cun di fat chês cimis di cjapituladôrs di cheste Republiche a slas condanât a pote vie i istitûts scolastics a batisi a muart un cuintri chel altri par sigurâsi un numar di iscrits bastant a garantî puescj di vore oltri che sostancis aes direzions, si che capriç des fameis e scjadiment cressint de societât no da râr a detin la regule di acetâ cidins situazions di no acetâ. Profonde, radicâl, dissension o vuei pandi – al rionç il dean prof. Travain – viers di cui che, soredut cun incarghis di responsabilitât su chel front specific, al sminuìs i câs di bularie o ben di cressint ingovernabilitât scolastiche e sociâl de nestre zoventût, ingovernabilitât che dut chel cjatâ simpri justificazions al pues nome puartâ a finâi consecuents. No si risolf il probleme de bularie e de ingovernabilitât scolastiche sôl cul studiânt a academic vie e cul calumânt resons e lidrîs: si à di agjî cun sintiment, sul cjamp, no nome teolighis, e ancje riclamant lis Istituzions a chei dovês di travuardie dal ordin public e de sigurece, oltri che dal oblic/dirit di studi, che si pues ben crodi che ancje in ciertis scuelis de Piçule Patrie furlane in chescj timps ultins a sedin clopâts. Te vite, te societât, si pues ancje, e purpûr cuntun limit, clamâ o pretindi la tolerance: no però a scuele e no te politiche, farie e guvier de societât istesse! Lis scuelis publichis, duncje, che a vedin juste la onestât di declarâ la impussibilitât, cul regjim che al è sù, di garantî pardavêr l’ordin e une valide formazion civiche ai lôr students: a saran plui credibilis e costrutivis e soredut a sunaran un campanel di alarmis che nol ametarà indiferencis e nancje ritiradis tes scuelis privadis, che resons di marcjât a puedin obleâlis a finzi compagn. Alternativis? In plui dal disastri e des cjacaris di braghessons, bonats e matarans, che a crodin di studâ cuntune tace di aghe un fûc che al podarès slargjâsi prest ancje in Friûl al pont di lâ fûr control, propit nol è altri! La Scuele e merete un bon mot di popul pe sô funzion di garanzie civîl!”