VINARS AI 19 DI DICEMBAR 2014

“Rapresentants preseâts, daûr des celebrazions spontaniis resintis, di scuele e di popul, tal ricuart di bons. Giuseppe Merlino, ‘Il Leon di Palme’ vâl a dî il plevan de citât che tal 1945 al jere rivât a divoltâ i naziscj dal intent di fâ saltâ par aiar la fuartece, tant che pape Leon il Grant cun Atile juste scuasit, che daûr de liende al veve salvade Rome dal stermini, si cjapisi sù culì di presentâ e di puartâ indevant li di Lôr un domandament popolâr legjitim di rignuvît ricognossiment de figure di chel personaç che si calcole che al sedi dabon di dovê che si intestii juste ben un lûc o une istituzion di significât te citât che lui i voleve tant ben e che cun lui e je tant in debit. Al Lôr bon acet culì si confidin chestis sperancis, che chel benemerit che al jere rivât a dâ vie se stes par salvâ ducj cuancj – ‘Fasêtmi saltâ me al puest de citât!’ – nol vedi di sei tradît, facil, cul timp a lâ, de dismentie de sô int e di cui che le rapresente”. Ve il test, biel franc, dal domandament indreçât al Sindic, ai Assessôrs e ai Conseîrs comunâi di Palme ai 27 di Avrîl 2012 propit di bande dal Moviment Civic Culturâl Alpin-Adriatic dal Fogolâr Civic e compagn dal Circul Universitari Furlan de Academie dal Friûl. Cumò, ai 17 di Dicembar 2014, tal 60m de muart di bons. Giuseppe Merlino, i àn intestât a chel benemerit plevan l’ospedâl de localitât, struture che e servìs une buine fete di teritori. Il proponiment, acetât di ducj cuancj i sindics de Basse furlane e des autoritâts sanitaris cjapadis dentri te iniziative, al jere vignût fûr in Consei comunâl a Palme cul dibatiment inviulât dal conseîr Flavio Zanus, prin a cjapâ sù e a sostignî il domandament di invalorî il ricuart di chê figure midiant di une adate titulazion, domandament presentât doi agns prin di Fogolâr Civic e Academie dal Friûl direzûts dal prof. Alberto Travain che, come insegnant, par so cont, in chê volte al veve movût ancje i fruts di scuele a fâ ricercje su la veretât e la cussience storichis dal teritori su chei fats alì. Un tant midiant di cerimoniis publichis di students cui onôrs su la tombe di Bonsignôr compagn di chê dai 24 di Avrîl 2012 te gleseute locâl di Sant Francesc o traviers di incuintris di testemoneance di popul compagn di chel stât in municipi ai 29 di Mai di chel an cul titul “Merlino, Ottomeni & C. Chi salvò Palmanova dalla distruzione nel 1945?”, cuntune partecipazion di public juste di rivuart. “Fasêtmi saltâ me al puest de citât!” i varès dit il plevan al comandant todesc, daûr preziosis testemoneancis tiradis sù propit dai scuelârs dal prof. Travain. E ancje ben preziosis lis atestazions dal ricuart popolâr su la part in chê volte vude dal interprit Luigi Ottomeni, di une bande, e de famee di chei di Mersi, di chê altre, che in citât e veve in gjestion il telefon public. Di chel incuintri a son restâts dai contribûts scrits, che i autôrs jai vevin lassâts di studiâ e divulgâ a la scuele mezane locâl. Po ben, cualchi setemane dopo, finide scuele, il prof. Travain si jere cjatât juste insom de sô incarghe, si che lis robis a jerin ladis in mût che di dut il lavôr scolastic fat la plui part e les propit pierdude. Chel professôr, di privât so intent, al comant des fradaiis za movudis in favôr di une ricupare de memorie dal teritori sul câs dal salvament di Palme tal ’45, al è lât dilunc cul testemoneâ la impuartance dal ricuart di chei fats ogni an cui onôrs, ai 24 di Avrîl, alì de tombe dal Prevost, su la ricorence des faturosis tratativis imbastidis par parâ la citât; e al è lât dilunc ancje a tirâ sù testemoneancis sul argoment. Vinars ai 19 di Dicembar 2014, te Sale dai Riceviments de Loze dal Lionel a Udin, cjase dal Comun, il Fogolâr Civic al à, duncje, memoreât il 60m de muart di bons. Merlino, “furlan eroic che une capitâl dal Friûl degne dal non che e puarte – al à dit Travain – no pues ciert discjolisi di fâi onôr ancje ben pal fat che al à juste salvade chê opare mestre di citât ideâl dai timps de Rinassince che e piture la Piçule Patrie sui libris di architeture e di urbanistiche di dut il mont, un tant dit cence dismenteâ la legjitime contrarietât sul imprin di chei di Udin e di tancj Furlans a pet de costruzion di une fuartece governative ‘foreste’ sul lôr teritori”. Testemoni di rivuart il palmarin pre Tarcisio Bordignon, “capelan” dal Fogolâr Civic, che cun ricjece di particolârs e comozion sclete al à ricuardade la figure dal prevost che lu veve instradât di predi, dantji, cul so esempli di vite stratignude e caritatevul, cul so trat simpri autorevul e disponibil fintremai al sacrifici, un spieli alt e persuasîf di mission dai oms di Glesie, di pastôr vêr de comunitât. L’inmagât ricuart di frut di une Prime Comunion intant de Messe di Madins a Nadâl dal 1937, intune gleseute di Sant Francesc plene incolme di int, si à cjatât, alore, compagnât cun chel de liberazion di Palme dal ’45 e de vôs sparniçade in chê volte in cont dai merits di Bonsignôr pal pericul sghindât de distruzion de citât, merits che lui al veve pesseât a riferîju a chê Madone dal Rosari che la sô imagjin ancjemò si onorile tal Domo locâl. Peraulis di laut particolâr destinadis al personaç lis à pandudis ancje il president provinciâl di Udin dal Istitût nazionâl talian dal Galon Turchin jenfri combatents decorâts al valôr militâr, gjeom. Sergio Bertini. Finide la comemorazion a son stâts i onôrs di popul in memorie cu la riverence des bandieris associativis. Presints tra i conseîrs movimentâi, in plui dal gjeom. Sergio Bertini, lis sioris Marisa Celotti e Jole Deana, sâr Eugenio Pidutti e il tenôr Gianfranco Savorgnan; tra i banderârs, la siore Laura Nazzi e il vessilîr gjenerâl sâr Gianfranco Passone.

Precedente VENERDÌ 19 DICEMBRE 2014 Successivo LUNEDÌ 29 DICEMBRE 2014