VINARS AI 19 DI SETEMBAR 2014

“Ancje nome ametint il referendum su la indipendence de Scozie il Ream Unît al à mostrât grâts di democrazie che te democratiche Republiche Taliane a partegnin al mont dai siums che a son parfin incostituzionâi”: ve il prin coment dal dean dal Moviment Civic Culturâl Alpin-Adriatic dal Fogolâr Civic e dal Circul Universitari Furlan de Academie dal Friûl, prof. Alberto Travain, devant dai risultâts de votazion scozese. “Su lis risultancis dal referendum – al à dit sù il menadôr dal piçul moviment euroregjonalistic – a puedin ben e no mâl vê pesât, di une bande, lis cjacaris a ûs ‘teroristic’ di part no minime de stampe, contrarie di une idee di secession de Scozie, di chê altre, lis posizions vuarbis di Brussel cuintri di secessions ‘intracomunitariis’ che pursì a domandin ricet politic dentri te Union, posizions che a van di chê strade cu la contrarietât dal President merecan dai Stâts Unîts su la eventualitât di une indipendence scozese e che a fasin l’efiet di sburtâ i indipendentiscj di ogni Stât UE tal braç des potencis interessadis a creâ fastidis a un progjet di Europe fuarte e unide, che di chês potencis sigûr no mancjin”. Brussel e Vassinton che no cjantin vitorie: se la Union Europeane no si unìs dal bas e no devente une unitât armoniose di popui, di comunitâts locâls e regjonâls, direzude, in democrazie, di rapresentants votâts e se mai si pues no ‘telecomandâts’ des clapis finanziariis, e sarà la sô fin, magari cussì no. Une grande ocasion pierdude par concretâ une biele union dal Continent”. “E che no cjanti vitorie nancje Rome. E ce pensie la sorestanzie dal Fogolâr Civic in cont di un referendum su la indipendence furlane? Miôr un savi, legâl, referendum cence contrast in materie di autodeterminazion ven a stâi su la afermazion culturâl, morâl, di un dirit di decidi suntun destin di comunitât, dirit basilâr ricognossût ancje dal Stât talian cuant che al à invadût il Venit e il Friûl udinês tal 1866, che al à inmaneât un plebissît, ancje contestabil te forme, calcolant purpûr lis popolazions ‘liberadis’ di figuris politichis pôc o trop furnidis di sovranitât. Di autonomie, federazion e, in ultin, di indipendence che si feveli nome che dopo… Se tal 1866 i popui furlan e venit a àn podût votâ di sei agregâts a la Italie al vûl dî, resonantji parsore, che a àn dirit di esprimisi in cont di partignince statâl ametût ancje ben de Italie co e jere un Ream e no une Republiche che chel dirit invezit lu dinee”.