VINARS AI 21 DI FEVRÂR 2014

Cinccent agns indaûr, a Osôf, un scjap di Furlans, comandât di chel mastin di cjapitani che al jere Jeroni di Savorgnan, al vincè fasint front cuintri di un sglavinon di soldâts dal plui grant imperi european dai timps. Sierâts di ogni bande e restâts cence aghe, i Furlans ur derin di bevi vin ancje ai cjavai, che la liende e dîs che al vignarès fûr di li il cjavalut rampant che al figure ancjemò te steme de capital dal Friûl. Chel fat storic al è stât ricuardât a Udin, vinars ai 21 di Fevrâr 2014, par cure dal Moviment Civic Culturâl Alpin-Adriatic dal Fogolâr Civic e dal Circul Universitari Furlan de Academie dal Friûl, direzûts dal prof. Alberto Travain, sul scjalon di onôr di Palaç Daronc, li che in principi e varès vût di sei metude une statue dal Savorgnan (al so puest vuê al è un vâs!), par vê simpri iniment trop salde che e jere une volte la int de Furlanie. Cheste memorie e je stade in code di un incuintri uficiâl vût des lôr fradaiis cul sindic prof. Furio Honsell, li che a àn rionzudis istancis e propuestis par âf i contats tra citadins e sorestants, ancje cul publicâ, sul sît web istituzionâl, lis direzions di pueste eletroniche dai conseîrs comunâi, cemût che al sucêt za pai lôr coparis di Provincie e Regjon. Fogolâr Civic e Academie dal Friûl si son lamentâts ancje pe no masse disponibilitât a scoltâ e a cjapâ dentri la societât civîl sui programs des ativitâts dal Comun di Udin, di regule in mans di assessôrs e uficis. Lis dôs organizazions a son tornadis fûr po cu la domande di un “sfuei” informatîf, di scjariâlu di internet e di vê in stampe li dal Puntoinforma di Vie Savorgnane, cuntun lunari complet e inzornât dai câs sociâi e culturâi de citâts, mighe no dome di chei inmaneâts o patrocinâts dal Comun, ma ancje ben di chei imbastîts sù de int e des associazions, segnalâts sigûr dai promotôrs e ripuartâts cence “tamês” di sorte che nol sedi chel de legalitât. Suntun tant il Sindic si à cjapât l’impegn. Biadelore che al sedi un servizi come cu va pe culture dal bas, pes iniziativis e pai tancj incuintris di un volontariâts e di une societât civîl vivarôs che di un tant la int e à dirit di savê. “Tiessi, come Comun, une ret di ce che si fâs e che si propon in citâts – al dîs Travain – al vûl dî, cence spindi e spandi, impegnâsi tanton par tornâ pardavêr a fâ vivi Udin, prin interès sigûr di ducj cuancj!”. La delegazion movimentâl che e à incuintrât il Sindic, oltri che dal dean prof. Travain, e jere formade dai delegâts dai cinc “cuintîrs” dal Fogolâr Civic: gjeom. Sergio Bertini (1n Cuintîr), siore Jole Deana (2nt Cuintîr), tenôr Gianfranco Savorgnan (3rç Cuintîr), siore Oriana Lucio (4rt Cuintîr) e prof.e Renata Capria D’Aronco (5nt Cuintîr). Pe ocasion memoriâl po a rivâts dongje int e rapresentancis de societât civîl e culturâl dal teritori, de federazion provinciâl dal Istitût nazionâl talian dal Galon Turchin insin a la Pro Loco di Citât dal Borc dal Soreli di Udin Disore e a la Fradaie dal Crist. E jere juste ancje la studiose dot.e Marisanta di Prampero de Carvalho.