VINARS AI 22 DI AVOST 2014

“Cjârs soldâts! Vuê si sin incuintrâts chenti, tal teritori dulà che di secui a coabitin popui romançs e slâfs, a fin di comemorâ la vuestre vite, parcè che la muart e cjape part de vite. Mi domandi però cuâl che al fos il vuestri contribût al miorament de cualitât de vite tal nestri mont: ideolics e politics a disin che la vuere e puarte gnûfs valôrs ae int che e sorevîf, che ducj a àn di imparâ alc des pierditis e dai sacrificis dai lôr patriots e che lis gjenerazions seguentis a scugnin seguitâ lis ideis dai predecessôrs. O soi dacuardi che al sedi impuartant di jessi coragjôs te vite, ma intune maniere divierse. Mi domandi se o vin bisugne di plui coraç par vivi in pâs o par lâ in vuere. La decision di partecipâ in bataie e je plui dure, dal sigûr: particolarmentri cuant che a son altris che a cjapin cheste decision par nô. Al è facil mandâ cualchidun altri a murî tal non dai propris interès politics o pûr economics. E je però une injustizie cence pâr. E propite chest al è sucedût a voaltris, cjârs amîs. Us àn mandâts a batisi, a dreture a murî sul cjamp di bataie, cun chê che noaltris o vivessin miei; invezit, vivìno verementri miei? Forsit sì: no sin condanâts a murî ‘pe patrie’, ma no dismenteìn che nus tocje frontâ ogni dì i problemis de nestre societât plene di delusions, di mancjance di leams di amicizie, di mancjance di cûr e anime, duncje la nestre e je divignude une societât vueide e disorientade. A voltis no savìn plui cemût tirâ dilunc, ni ce vie sielzi par corezi i erôrs di altris, chei istès altris che us àn mandâts intes tombis su la flôr de zoventût. Tal dì di vuê o vin ancje nô i nestris ‘altris’ che nus mostrin i lôr muscui, magari intun mût diferent. No nus lassin dî la veretât, a provin di costruî gnovis barieris tai cjâfs dai citadins e jenfri dai popui, a robin i bêçs ai puars e no vuelin nissun voltament te societât, podint cussì plui facilmentri controlâ la situazion e mantignî il podê assolût. Noaltris, dut câs, no vin pierdût la nestre orientazion: la volontât di lotâ pai dirits de umanitât, di colaborâ cui popui confinants come ancje cun chei plui lontans. O vin ricognossût che i conflits fra i popui europeans a jerin di fat conflits fra, di une bande, pocjis personis che a volevin e a vuelin simpri tignî tes lôr mans la autoritât e i destins de int e, di chê altre, la int che no podeve decidi di nuie. Al è rivât cumò il moment che cheste int e tachi a capî di ce che si trate e soredut il moment de nestre bataie. E sarà une vore diferente a pet de vuestre. Cjârs soldâts, voaltris o vês vinçût la vuestre bataie personâl, o jeris degns e coragjôs, o jeris capaçs di sacrificâsi pe societât: la bataie dai vuestris sorestants, magari cussì no, no jere degne e no à dât risultâts positîfs ae umanitât. Il vuestri messaç al è che robis dal gjenar no àn di ripetisi tal avignî. O restais no dome in nestre memorie e storie, ma o restarês vîfs tai nestris cûrs. Cun di plui, us prometìn di trasformâ la vuestre muart intune amicizie, intun amôr, che nissun mai nol podarà rompi. Graciis, cjârs Amîs, us augurìn pâs e ripôs”. Ve ce biele la letare indreçade in ideâl ai soldâts de Prime Vuere dal prof. David Bizjak, coordenadôr de rame slovene dal Moviment Civic Culturâl Alpin-Adriatic dal Fogolâr Civic, lete dal autôr te sô version origjinâl furlane, in onôr dal lengaç vignût fûr dal latin de metropul internazionâl mittel-europeane antighe di Aquilee, intant di une cerimonie in ricuart dai cent agns di chê tremende coparie “tra fradis” dal Continent e di dut il mont, rimembrance volude de organizazion juste alì de Stele di Visinâl, in Comun di Cuar di Rosacis, stele che e fâs memorie dal prin colp di sclope trat dai Talians su la rive dal Judri, confin di tancj secui che al à vût sbregât il cûr di un patriarcjât aquileiês antigon che indâur al veve dât dongje di fradis sul pont spirituâl ma ancje te politiche popui diferents a cavalot des Alps di Soreli Jevât, su la crosere de Europe in cont di gjeniis e lengaçs. “Mai plui vuere tra fradis!”: ve il sproc te dediche pontate tal mac di rosis di cjamp poiât jù dapît di chel monument ai 22 di Avost 2014 dal president dal Fogolâr Civic, prof. Alberto Travain, li che lis bandieris dai cinc “cuintîrs” sociâi dal Friûl a fasevin i onôrs chei civîi a lis vitimis di chê disgracie di za fa cent agns. Cussì, duncje, il moviment euroregjonalistic al à volût memoreâ ancje chest an, intune maniere particolâr, sot de ricorence, chel aniversari storic medievâl aquileiês di Sant Bortolomiu, inovâl di une dismenteade ma epiche bataie tra int regjonâl sot bandieris contrariis, prefigurazion di altris disastris locâi e internazionâi, vignûts plui indevant e ancjemò plui grivis. Chê rapresentance istesse e jere za stade in zornade a riverî i muarts de Prime Vuere alì dal cimitieri militâr di Breçan di Cormons, tal program des rimembrancis promovudis di tradizion de Associazion Culturâl “Mitteleuropa”. Tes cerimoniis a jerin ancje i conseîrs dal Moviment gjeom. Sergio Bertini, siore Marisa Celotti e siore Jole Deana; di banderârs fraternâi, a jerin po lis sioris Luisa Faraci e Elvia Tosolini in plui dal vessilîr gjenerâl sâr Gianfranco Passone. Te compagnie, al jere ancje il cultôr passionadon di memoriis asburgjichis dal Friûl Orientâl prin de Prime Vuere, mestri Alfredo Orzan, simpatizant dal Fogolâr Civic.