VINARS AI 26 DI JUGN 2015

“Sâr President, ancje par cui che, compagn dal circul che ca si firme, fin cumò al à dât gjenerôs servizi a la comunitât no mai superant il confin rigorôs de espression culturâl plui rampide, vuê no si rive a clamâsi fûr dal cjapâ part politiche stant che politic al è cence fal, rivâts a chescj ponts, il pericul pe Italie: al somee che si vedi comandade al Parlament une riforme scolastiche cul ricat di no cjoli a vore se no 100.000 provisoris dal ram, che a àn di sei invezit cjolts par destinazion eurocomunitarie e no di graciôs regâl dal guvier, tant che le presentin! Lassant di slungjâsi cun resonaments juste ben sul merit dal ddl presentât tes Cjamaris e distès seguitant, tal rispiet di un statût, te particolâr “difese dai dirits e dai interès dai students furlans”, dirits e interès spartîts za di un secul e mieç incà cui lôr coparis di dute la Italie e sigurâts, di tradizion e di reson, di une scuele publiche indotade prin di dut di un sens dal Stât e insedade su regulis claris e no sul stâ a discrezion di cualchidun che chel nol va ben, ve che alore il circul che ca si firme al calcole no dome par dovê civic chel di denunziâ la tiranie di ciertis pratichis di guvier che a son che a usin cumò, si met dongje dibot cun chei che a varan olsât cun rispiet di sburtâlu di ce che Al pues a stâ simpri plui atent di ce bande che a tirin ciertis mecanichis de democrazie ca di nô”. Jal àn scrit juste par talian e in “marilenghe” al president Mattarella chei dal Circul Universitari Furlan de Academie dal Friûl che cierts mûts dal guvier dal Renzi a son nome che tiranie arude. Il lamp che al à fat sclopâ il ton e vignî sù il fum a chê fradaie storiche, nassude tal grim de Universitât di Udin e fin des partencis impegnade prin di dut te formazion de identitât civiche dal Citadin partint de misure locâl? Baratâ il dovê di cjoli a vore personâl precari cul fâ buine la dibatude riforme scolastiche inviulade dal Governant che, in pratiche, i à fat gloti e votâ al Parlament la sô idee di scuele, pront, se no, a butâi intor la responsabilitât di inibî la assunzion in plante stabile di 100.000 insegnants! Te missive destinade al Quirinâl, firmade dal dean de Academie dal Friûl, prof. Alberto Travain, e dal conseîr sociâl ad hoc, prof.e Fulvia Romanello, chê fradaie e à riclamât, cun rispiet, il President de Republiche ae necessitât di une vuardie simpri plui atente su la situazion che si cjate in vuê la democrazie in Italie. E chest dal sigûr ancje ben pal fat che di un tant e risint ancje la tiere furlane, di scuasit 150 agns part di chel Stât alì. E mighe nol baste: “la Academie dal Friûl e mobilite – al professe il dean Travain – e in pont di culture sul teritori si infronte cuintri dal Guvier in favôr di riformis scolastichis di plante fûr che i tornin a un Stât dabon democratic o a un Ent politic similâr la responsabilitât direte dal maneç de Scuele publiche, deventade vuê une ‘Babilonie’ di pretesis un cuintri dal altri!”. Par chel troi za di timp al cor ancje il Moviment Civic Culturâl Alpin-Adriatic dal Fogolâr Civic, che la Academie dal Friûl di chel al è branc autonim antîc e nobil.