VINARS AI 27 DI FEVRÂR 2015

Vinars ai 27 di Fevrâr 2015 a Udin, alì dal Bar Savio di Place dai Grans, tal inovâl e tai lûcs dal famôs ribalton di popul de Joibe Grasse 1511, paragon storic locâl di riviel cuintri des injustiziis, sore sere e je stade la presentazion ai sorestants dal Comun dal “Censiment di Popul sui Mâi di Cumò”, pensade dal Moviment Civic Culturâl Alpin-Adriatic dal Fogolâr Civic. “Ce eliminaressistu par miorâ il mont partint di Udin e dal Friûl? Cuâi sintiments? Cuâi compuartaments? Scrivilu al Fogolâr Civic! Compile e imbuse la schede di rilevazion tai bossui a pueste, creâts dal artist udinês preseâts prof. Michele Galliussi e instalâts tai ambients de Capitâl dal Friûl ospitâi cu la iniziative!”. Ve culì l’apel dal cenacul civic direzût dal prof. Alberto Travain, in cunvigne cul Club Unesco di Udin e ducj i sogjets sociâi di chê idee. Cussì e rive insom une lungje e variade opare di scandai sul teritori in cont di valôrs e ideâi di cumò in materie di comunitât e umanitât, in cercje di rampidis basis par une comugne morâl – fondamente di union sociâl e civîl – juste di riviodile e di rionzile intune epoche indulà che la reson egoistiche e chê relativistiche a permetin dut. “Par une ‘Costituzion’ furlane dai valôrs locâi e universâi” al spieghe il manifest che midiant di chel il Fogolâr Civic al à nunziât il so particolâr censiment cul fin di “tornâ a definî il ‘ben’ comun intune crosere de vecje Europe, erede de liende di vierzidure de citadone antighe di Aquilee”. Ve che lis risultis di un prin lustri di consults, instradâts cu lis scuelis dal 2010 incà tes formis di une ligriose revision di memoriis e rituâi di Carnevâl centrâts sul sdrumâ cjistiei, intestâts par simbul in timp di cumò a lis “pecjis” dal vivi presint (un ricuart juste pes cinc butadis dal “Carnevâl Civic Studentesc” ogni an inviulât di Fogolâr Civic e Academie dal Friûl tal inovâl de “Crudêl Joibe Grasse”), vuê a saran metûts in votazion tra i aventôrs plui variâts dai ambients de capitâl de Furlanie Storiche: votazion segrete dentri di bossui a pueste, ancje chei in figure evocative di toressis, in chel câs rivoc di fuartece morâl e di difindisi un cul altri, opare dal artist menzonât di Udin prof. Michele Galliussi, che, cun trat di tacuin di viaç, a ognidun i à volût dâ funzion di riclam di un monument a torate simbul di un “cuintîr” citadin di une volte. Dopo sîs mês di consultazion popolâr ator pai ambients di Udin riferîts a lis cinc storichis circoscrizions urbanis primarolis, ai 13 di Setembar 2015, tal 792. Complean de Citât, ve che si tacarà a scrutinâ lis schedis, dadis in man a une comission di “savis” nomenade e sot presidence juste dal Coordenadôr Gjenerâl dal Fogolâr Civic, prof. Alberto Travain, che e varà l’assum di meti jù, prevedint ancje ben par strade ocasions di aprofondî i cantins, un stampon di “declarazion” o ben di “costituzion” di principis, di presentâlu ai 9 di Dicembar cu ven, tal momentôs inovâl culturâl de Pretension de Contadinance dal Friûl (1503), zornade valide par un orgoi civic regjonâl. Rivâts a chel pont, si calcole un mês – fin a Pifanie – di tornâ a vierzi i bossui, cul chê di dâ dongje i rimarcs dal popul sul test proponût, e altris doi par scrivi il document finâl che si varès gole di presentâlu a Cividât, citât mari de regjon, pes Idis di Març dal 2016, tal aniversari che si memoree Iulius Caesar “pari dal Friûl cûr de Europe”, che di chê date e scomençarà la consultazion sociâl di ratifiche che a so timp si stabilirà cemût, che al vâl compagn par tancj altris detais di un program che al è simpri passibil di gambiaments e di revisions. La iniziative, pûr no disdegnant, a fin di propagande, il mieç informatic, e vûl metisi in mostre par une clame de “place” reâl, ametût che e esisti ancjemò, invidade, almancul tes primis fasis, a movisi fûr no sôl tal virtuâl. Preseant la iniziative, il conseîr comunâl av. Paolo Perozzo, capitât dongje pe presentazion, si à metût a disposizion lui par puartâ tai mês a vignî ancje in Consei comunâl chel bossul ispirât ai trats – che in ideâl a unissin dute la Furlanie – dal cjampanili dal Cjistiel di Udin, opare dal artist prof. Michele Galliussi, screade tal innomenât ambient che gjerent e je la dot.e Daniela Michieli, lûc di riunion dal Fogolâr Civic su chê storiche “Plasse dal Fisco” che e à cjapât il puest di un dai palaçs de plui potente nobiltât furlane, sdrumât jù pai secui dôs voltis a furie di popul, monitori simbolic viers de paronance dai sorestants o dai privilegjâts di ogni ete. Cu lis rapresentancis dal Moviment, juste ben a jerin ancje i conseîrs gjeom. Sergio Bertini, sâr Giuseppe Capoluongo, prof.e Renata Capria D’Aronco, siore Marisa Celotti, siore Jole Deana, dot. Carlo Alberto Lenoci, siore Antonietta Monzo Menossi, dot.e Maria Luisa Ranzato e tenôr Gianfranco Savorgnan. Al à vût di just compliments cetancj il prof. Galliussi che al à dit che al è un onôr par lui di supuartâ cu la art a une iniziative dabon cussì degne.

Precedente VENERDÌ 27 FEBBRAIO 2015 Successivo SATURDAY, FEBRUARY 28TH, 2015