VINARS AI 27 DI FEVRÂR 2015

La memorie sociâl dai 504 agns dal ribalton di popul famôs de Joibe Grasse 1511, paragon storic furlan di riviel cuintri des injustiziis, ai 27 di Fevrâr 2015 a Udin e à vût di premetidure un incuintri-dibatiment public cun titul “Cuintri di cui e di ce rivoltâsi tal Friûl di cumò?”, inmaneât dal Moviment Civic Culturâl Alpin-Adriatic dal Fogolâr Civic in cunvigne cul Club Unesco di Udin alì de antighe ostarie “Grappolo d’Oro” (nassude “All’aquila imperiale”) in Vie Stringher 5. Daûr di chel incuintri su lis necuiziis te societât furlane di une volte e di cumò, introdusût e direzût dal prof. Alberto Travain e dal dot. Carlo Alberto Lenoci cul supuart de prof.e Renata Capria D’Aronco, al è stât l’at tradizionâl di poiâ jù une rose par ricuardâ la “Crudel Zobia Grassa”, presint pes vitimis des prepotencis in Friûl e pal mont, juste li devant che al è il Poç di Sant Zuan, testemoni des primis bataicis dal 1511, un tant cu la riverence des bandieris chês dal Moviment e des sôs sezions di “cuintîr” di citât e regjon. Al jere ancje il president de Comission sul Statût dal Consei comunâl di Udin, prof. Natale Zaccuri, che al à pandût che chê Comission e à acetât ciertis bielis istancis di culture civiche za fa timp presentadis dal Fogolâr Civic. Des rapresentancis sociâls a jerin i conseîrs gjeom. Sergio Bertini, sâr Giuseppe Capoluongo, prof.e Renata Capria D’Aronco, siore Jole Deana, dot. Carlo Alberto Lenoci, dot.e Maria Luisa Ranzato, tenôr Gianfranco Savorgnan, il vessilîr gjenerâl sâr Gianfranco Passone e, dai banderârs, siore Elvia Tosolini e sâr Adriano Zoccolo. “Çuetâ i cjavai par fâ cori i mus!”: cuntune magnifiche detule furlane il dot. Lenoci al à piturât in struc il costum displasevul, par so cont dut locâl, di impedî lis personis validis e di favorî chês plui robe di nuie, par sigurâ ecuilibris di podê di famee e di congreghe di no tocjâ. Introdusint chel incuintri-dibatiment par preambul de scree di une iniziative dal Fogolâr Civic di “Censiment di Popul sui Mâi di Cumò par une Costituzion furlane dai valôrs locâi e universâi”, il prof. Travain al à fate une resonade sul pont des “necuiziis storichis de societât dal Friûl, necuiziis carateristichis di une culture feudâl sprolungjade e sparniçade, di un podê la plui part di rive jù, di un spirt padronâl difondût, no dome des sorestanziis ma ancje ben, a cjadene, de intute, compliçs in cualchi maniere sigûr cierts modei promovûts de Glesie”. “Une tiranie slargjade, che e cjape dutis lis categoriis, pôc o trop taponade e, si capìs, pronte simpri a dineâsi ancje li che si pant plui a clâr!” al à dit il dean dal Fogolâr Civic. “Perfidie e invidie”: ve lis dôs colonis in mâl de Furlanetât piês secont Travain. “Dut chel esaltâ tant la fedeltât che si cjatilu te storie furlane al scuint par daûr juste ben il dubi di une doplece inlidrisade dentri tal implant stes di une tâl situazion di crosere e confin. Di ‘Friulan enigma’, di ‘enigme furlan’, a fevelin parfin ancje cun di fat cierts storics di chei puntiliôs di Americhe! Une Furlanetât di no rivâ a definîle, di no rivâ a capîle no dome pal lengaç. La idee antigone di une lenghe struc di dutis chês altris dal Continent e la convinzion di sei in stât, midiant di chê, di capî ducj e di no sei capîts ad in plen di nissun a àn sostentade par secui la liende di un mont locâl ermetic in particolâr. Compagn, dut chel lâ dilunc a esaltâ a bon fin la onestât publiche e privade dai Furlans, cun lontans rivocs in riferiment de native ‘rusticitas’ paleocristiane, i fâs di ledrôs a une brute liende di riviel e disordin tignût par cjamp libar di tratâ confins balarins daûr di volubii rapuarts di fuarcis: si à parfin scomodât il bon Beât Beltram par trasmudâ dut fintremai intun stamp di epiche di popul! Ce lidrîs che e vedi po la litigante, proverbiâl, invidie furlane – biele la detule che e dîs che tai orts dal Friûl no ven sù no la indivie ma ben la invidie! – juste no si sa” al à dit Travain. “Riundis italichis o inmò prin celtichis? O la nature dal puest, che a insinuavin un tant bielzà cierts tratâts di culture politiche de Rinassince?”. “Ciert al è – al à seguitât il dean dal Fogolâr Civic – che al è stât un evolvisi, un menâ, des robis, par maniere che chel caratar sempliç, salt, onest, lavoradôr servizievul, deventât bandiere de Furlanetât jenfri Vot e Nûfcent, al è stât dabon il licôf finâl di une costruzion vignude a pinel, par volê o almancul cul benvolê dai sorestants parsore. Il stamp dal Furlan necuitôs si à cjatât par solit, duncje, cumbinât cun caratars plui prest solitaris o anarchics, no in stât di cusî grandis telis mafiosis complicadis, cence paragon cun chês piçulis bandis di cuintribandîrs ‘par vivi’ che par tancj secui a àn scorsizât ‘des monts insin al mâr’, câs lontans sigûr di ce che il Friûl al varès cognossût par dret o ledrôs dopo tirât dentri tal Stât talian. De anession di Udin tal 1866 a chê ruvine di taramot dal 1976, seguît, che si sa, dai bêçs rivâts dongje a pro de amirade ricostruzion che e je stade, però plui materiâl che come valôrs, lis tapis di fonde dal ”intalianament’ politic e economic de regjon furlane al pararès che in cualchi maniere a vessin dabon coincidût cun svilups di mentalitât che a àn sgriât une vore il sproc sbandieradon dal popul ‘salt, onest, lavoradôr’, liende concretade plui facil vie di ca, dai nestris emigrâts, che no invezit in ‘patrie’. “Biliet di visite di rivuart al è chel che nus àn sigurât i nestris che a son lâts pal mont” al à mutivât chel professôr alì: “Un stamp positîf, che su chel salacor al à di vee incidût, in timps e mûts diferents, il model purpûr fat liende di un ordin asburgjic Provât e memorie di popul dai Furlans. ‘Gambiâ nuie fûr che la Austrie’ al veve tant racomandât al parlament talian un deputât dal Friûl di là de Aghe subit daûr de anession a la Italie savoiarde. Magari cussì no, invezit, si lu sa, al sarès gambiât tanton, e sigûr no in miôr!” al à comentât Travain.

Precedente VENERDÌ 27 FEBBRAIO 2015 Successivo VENERDÌ 27 FEBBRAIO 2015