VINARS AI 6 DI JUGN 2014

“Beltram di Saint Geniès al è nassût tor dal 1260 e muart ai 6 di Jugn 1350 intune vuaite dongje S.t Zorç de Richinvelde. Nol è stât dome un patriarcje, ma un pari pal Friûl e ancje il prin patron spirituâl laic tal mont. Il Friûl al à di dî graciis par tantis robis e prin di dut pe prime Universitât, inviade a Cividât tal 1344. Chê o pensi che e sedi la reson plui impuartante dal parcè che noaltris students o varessin di ricuardâlu cun massime gratitudin e stime. Di Cividât al à trasferidis diviersis ramis de aministrazion a Udin li che al à finît e consacrât il Domo. Ve mo parcè che o sin ca a ricuardâlu. Udin al à di dî graciis pe storiche assemblee democratiche dal Renc che par chei timps e je stade une novitât grande. Ve dome un pôcs dai parcès che ducj noaltris, citadins e in particolâr students, o varessin di fâi onôr al ricuart dal patriarcje Beltram…”. Al è stât un student di Udin, di scuele mezane, Marco Ciccarello, chel che al à ricuardât chest an, cuntun so discors, il Patron Civîl de capitâl dal Friûl, te tradizion des comemorazions popolârs de date che al fo sassinât chel benemerit patriarcje-princip “euroregjonâl” di Aquilee, “vignût de France par dâ la sô opare e la sô vite a fin di ben de patrie furlane”, comemorazions chês alì inviuladis ancjemò dal 1991 dal Moviment Civic Culturâl Alpin-Adriatic dal Fogolâr Civic e dal Circul Universitari Furlan de Academie dal Friûl che a son cumò in fieste pai vincjecinc agns de organizazion. A la privade deposizion di rosis li de urne di Beltram tal Domo, al presint di popul e a la antighe “benedizion des rosis”, vinars ai 6 di Jugn 2014, si son presentâts diviers rapresentants de societât civiche dal puest: fra chei la dot.e Marisanta di Prampero de Carvalho che intervignint e à vût iniments la tant dure bataie, puartade indevant in Consei comunâl jenfri 2000 e 2001, finide cu la proclamazion dal Saint Geniès par patron secolâr de int di Udin tant che a domandavin lis clapis e i “borcs” movûts dal moviment civic menzonât. A cerimonie a jerin ben ancje il vessilîr gjenerâl dal Moviment, sâr Gianfranco Passone, cu la insegne storiche aquileiese, e il banderâr di sezion gjeom. Sergio Bertini.

Precedente VENERDÌ 6 GIUGNO 2014 Successivo SABATO 28 GIUGNO 2014