VINARS AI 7 DI AVOST 2015

“Popui natîfs? Vuê si cjatìn par mût di dî devant di un ‘gjenocidi dolç’ di Furlans e Talians ven a stâi di une ospitalitât cence brenis di imigrâts forescj – no mi riferìs mighe al prin acet vâl a dî al socors umanitari – che, daûr des regulis in cont di etiche e religjon, economie e politiche che la Italie lis ricognòs, e finarà di savoltâ la cunvigne civîl za tant sassinade des nestris bandis dal moderni clopâ ocidentâl dal sens di comunitât. Un ciert mût di viodi la Cristianitât catoliche, il Capitalist liberistic e la Democrazie cosmopolitiche a son juste i cjavai di Troie dal nestri sisteme. Il probleme al è il vierzisi cence regulis e cence limits. Se pardabon no podìn inibî che ca di nô si instalin futûrs lavorents e citadins e compagn se no podìn proibî che nus capitin dongje ativitâts economichis che a rosein e a slambrin la nestre economie e la nestre societât, alore al è clâr che chel vierzisi ur gjave ai popui il dirit democratic sovran di programâ il lôr avignî, il lôr destin, la lôr consistence sul front demografic, sociâl, economic, culturâl, civic. E chel istès cumò o vin a ce fâ cuntun vierzisi no sôl cence brenis tai fats, ma ancje cence dirit di meti il peteç, di podê contestâlu, che se no si è segnâts di raziscj, di estremiscj, di int cence umanitât e sensibilitât, sierade e indaûr. Ve che za liberalizâ lis licencis di cumierç al è stât intun ciert mût rinunziâ a la sovranitât civiche sui teritoris. Se cui che al vûl al pues vierzi o sierâ ce ativitât che al vûl tes nestris tieris influint cussì tai lôr svilups, se cui che al vûl al pues sbarcjâ e in finâl stabilîsi tes nestris vilis cressint il numar dai lavorents o dai cencelavôr e prest ancje chel po dai citadins vâl a dî dai components ‘pleno iure’ des nestris comunitâts politichis, ve che fevelâ di popui natîfs, di travuardie dai lôr dirits, dai lôr interès, des lôr identitâts, des lôr culturis, in Friûl e in Italie almancul, al sa nome che di ridicul. L’an passât, intun incuintri Unesco compagn di chest, o vevi fevelât di chê biele idee, che il moviment dal Fogolâr Civic che jo lu promôf e dirêç le à puartade indevant fin cumò, chê di tornâ a implantâ moralmentri in clâf interetniche lis comunitâts locâls suntun compartî ancje culturâl dai teritoris. Un progjet gnûf e antîc. Une biele idee – la uniche salvece salacor, se no dai popui, almancul des culturis nativis, di compartîlis cui imigrâts – che a pro di chê però bisugne che e si movin fuarcis dabon trainantis o impositivis. Po ben, fin cumò lis Istituzions nol somee che si sedin motis in chê prospetive, impegnadis a promovi par solit interculture e no integrazion tes culturis dal teritori, a aministrâ un condomini simpri plui variât di particolârs e no a guviernâ une comunitât unide ancje se misclice e ripartide. La societât, la societât locâl, in ideâl une fuarce spontanie trainante e impositive, su chest pont e je stade zero. Ve che po, il sens di comunitât furlan – che a disin ce che a vuelin i siei promotôrs beçolâts tes Istituzions, soredut vuê sul pont de lenghe – al pâr che al sedi za di un pôc di timp, tal concret, in plene ritirade: e la colpe sigûr no je dai imigrâts ma ben dai Talians e dai istès Furlans: di une italianitât colonizadore di almancul 150 agns dai siei tiermits nordorientâi e di une furlanetât insotanade e amaestrade ma no par chest mancul responsabil de tignude de sô identitât. Rivâts a chest pont, a decidaran i numars: numars vuê o doman no saran plui a nestri favôr. Troie al è ben facil che e sedi za colade e o fasìn fente di no rindisi cont!”. Ve cemût che il dean dal Moviment Civic Culturâl Alpin-Adriatic dal Fogolâr Civic e ancje dal Circul Universitari Furlan de Academie dal Friûl, cun di plui delegât dal Club Unesco udinês pe Formazion Civiche e pe Citadinance Ative, prof. Alberto Travain, al è tornât, juste dopo un an, a Palaç Solari a Udin, te Universitât dal Friûl, vinars ai 7 di Avost 2015, sul cantin de Zornade Internazionâl dai Popui Natîfs che al lôr destin il dean dal Club Unesco dal puest, prof.e Renata Capria D’Aronco, al à pensât di dedicâi di gnûf un incuintri specific par resonâi parsore.