VINARS AI 8 DI AVOST 2014

“La sorestanzie dal Club UNESCO di Udin (Membri de Federazion Taliane dai Centris e Clubs UNESCO, socie de Federazion Mondiâl), in mans de prof.e Renata Capria D’Aronco, dutun cul Moviment Civic Culturâl Alpin-Adriatic dal Fogolâr Civic direzût dal prof. Alberto Travain, su consei dal arch. Giuseppe Vacchiano, dean de Pro Loco di Citât dal Borc dal Soreli di Udin Disore, e dispon di pandi pardut ce che si à concuardât tal celebrâ culì la Zornade Internazionâl dai Popui Natîfs 2014 (Liste des Zornadis Internazionâls di azion destinadis de ONU), cun lezions dai professôrs Renata Capria D’Aronco e Alberto Travain, vâl a dî l’avôt par une rifondazion secolâr e plurâl des comunitâts juste sparniçade, partint dal locâl e metint adun par ogni bande int native e vignadice ator dal principi dal compartî i teritoris là che si è a stâ e lis culturis alì insedadis dilunc de Storie, vicendis preziosis e inlidrisadis di vite de Umanitât e bastion in front di un globalizâsi tant disgregant che vualivadôr de societât e de civiltât”. Ve culì il test de note publicade dal Club UNESCO di Udin dutun cul Moviment Civic Culturâl Alpin-Adriatic dal Fogolâr Civic, sot dal prof. Alberto Travain, in code dai incuintris proponûts dal Club te capitâl furlane li dal Palaç Solari, cja de Universitât, vinars ai 8 di Avost 2014, te suaze des celebrazions mondiâls de Zornade Internazionâl dai Popui Natîfs. Te sô lezion, intitulade “Natîfs par sielte: propuestis furlanis di amôr pal locâl viert al mont in timp di mondializazion”, il prof. Travain al à tratât in specific il pont dai problemis des comunitâts e des culturis nativis, menaçadis vuê simpri di plui dal zûc mondialist, e lu à fat partint di une Furlanie “li che par tancj secui – al à vût iniment – la gjernazie native e la sô culture a àn vût combinât di rivâ a integrâ i vignadiçs, fin tant che nol à cjapât pît il Stât nazionâl talian, che, compagn di tancj altris parelis, al à vût cirût di sumierzi e di gloti int e identitâts particolârs di confin ancje cul implantâ numars mai stâts prin, se no si rimonte ai timps dai Romans, di soldâts e di burocrazie, ma ancje di int di scuele, di fûr de regjon. Un Stât che ur à vût ‘ insegnât ‘ ai Furlans par tant timp, no par vie de lenghe dome, a dineâ la furlanetât o ben a slungjâle o ingaiâle a pueste intune talianitât confinarie, juste buine vuardie cuintri des menacis veris e no dai “Barbars” solits di là des monts. Cumò di just si metìn in alarmis che lis nestris tieris a son invadudis di int, di culturis e economiis oltranis in câs dabon di strassomeâ la inficje e il costut dal nestri mût di vivi – al à batût Travain – e pûr no si sin no mai rivoltâts cuintri di un similâr slargjâsi di agnorum di stamp talianot o ben bassarûl? Il colm di un popul natîf che si rinee in pratiche bessôl a pro di altris identitâts o plui grandis o par dozenâl e stracapide vierzidure al mont vuê cetant di mode si intaie dal sigûr ancje ben te sielte des fameis in cont dal insegnament ai fîs dal furlan tes scuelis, sielte li che, no da râr, tancj natîfs a rinunziin e diviers vignadiçs di fûr dal Friûl o di Italie a aderissin cun curiositât, passion e gust di integrâsi!”. “Sarano chei a puartâ indevant la antighe civiltât furlane?” si à domandât par so cont il dean dal Fogolâr Civic. “Salacor no nus reste nuie altri che vivi e lavorâ cun cheste sperance legre e grame: chê di viodi tornade a implantâ une furlanetât native inlidrisade te culture storiche dal teritori e indreçade viers di un avignî di imbastîlu insiemit, ‘forescj’ integrâts e natîfs redimûts. No nus reste che rionzi cui gnûfs vignûts une furlanetât sacrificade sul altâr de nazion, de mondializazion e dal vueit!” al à concludût Travain “condanant a ogni mût pardut la violazion dal dirit di Nature a autodeterminâsi di ogni popolazion native, vâl a dî di decidi dal sô destin in democrazie, ancje ben sul se, su trop e cemût ospitâ e integrâ cui che al rive dongje. Su un tant lis Istituzions e in particolâr la Scuele a àn di colaborâ cun plui sintiment, cun plui cussience e cun plui snait!”.