VINARS AL 1N DI AVOST 2014

La segnalazion, daûr dai temporâi estîfs primarûi dai ultins di Jugn, che a jerin colâts rudinaçs dal cordul di une vecje cjase dal storic borc udinês di Cisis, po metude in sest, e à vût di finâl la biele scuvierte, che no si spietavisi, di une piture religjose dai timps di une volte, che i plui innomenâts gjornâi de citât al somee che no i vedin dât pês avonde. Ve che, alore, la siore Mirella Bragagnolo, che e je a stâ in chê contrade antigone li, persone cetant cognossude a Udin, ative une vore dentri cu la Glesie e su la culture, che e je stade sô fie chê che e à denunziât il dissest causion di chel venturât cjatament e ancje domandât notiziis sul fat a la Sorintendence, e à invidât sul puest, al 1n dal mês di Avost, il prof. Alberto Travain, popolâr studiôs e prudeladôr di storie locâl oltri che dean dal Moviment Civic Culturâl Alpin-Adriatic dal Fogolâr Civic e dal Circul Universitari Furlan de Academie dal Friûl, cun chê che al tamesi ce che al è vignût fûr. E Travain al à podût constatâ, duncje, ce maniere che chê piture, cun parsore la date dal 1707 e ritrats de Madone, di Sant Antoni cul Bambin Jesù e une altre imagjine di interpretâle, al è juste facil che e rapresenti spiei riferîts a la devozion popolâr e in particolâr di cjase te menzonade famee dai Menòs, che li si nomene une cierte Marie, famee vecjone dal Friûl che e je stade tal ultin secul ancje ben scune di artiscj di nivel internazionâl e che, stant a une prime disamine, a ogni mût al pâr che vie pal Sietcent no figuràs tra lis primis cjasadis di artesans e di contadins de vicinie dal borc ven a stâi dal antîc Comun rustic incitadinât di Graçan e Cisis e compagn des fradaiis plui impuartantis dal puest. Chê sacre figurazion, par cont di Travain, no somee che e vedi a ce fâ cul convent li tacât des Puarelis di Sante Catarine di Siene che ur disevin Rosariis, instradât sôl che tal 1709. “Se la figure no facile di incuadrâle, rimpinade intor di un baston, e ves juste par câs di sei chê di Sant Josef, alore pardabon – al à dit Travain – si cjataressin devant dai sants predilets di chê storiche comunitât di borc, in plui, si capìs, dal famôs so Sant Zorç, che in chei timps cun di fat chê za ur veve dedicât i altârs de capelute borghesane de Pietât”. Duncje, mertori l’interès pandût di chê citadine par une ricupare no dal manufat nome, che al da su la strade, ma ancje des sôs significazions plui profondis e dai siei riclams storics: un esempli valevul par tancj di lôr, int e Istituzions ancje, des voltis distrats rispiet a lis olmis lassadis de Storie, de culture civîl e religjose, de vite sociâl e intrinsiche dal Om, tal ambient di citât. Une idee sugjestive: chel afresc alì, cun date palese 1707, che in chel an in Europe e je stade, fra tantis, la famose union che e à leât Anglie e Scozie, al è saltât fûr juste tal 2014 che Scozês a laran a votâ il referendum par separâsi o pûr no di Londre… Une misteriose premonizion?

Precedente VENERDÌ 1° AGOSTO 2014 Successivo VENERDÌ 8 AGOSTO 2014