SABIDE AI 17 DI OTUBAR 2015

Compagnade dal prof. Andrea Tilatti, Delegât su lis Bibliotechis de Universitât dai Studis di Udin, une rapresentance dal Moviment Civic Culturâl Alpin-Adriatic dal Fogolâr Civic e dal Circul Universitari Furlan de Academie dal Friûl, guidade dal dean des dôs fradaiis prof. Alberto Travain, e je lade in visite, te capitâl furlane, li de storiche biblioteche nobiliâr di Palaç Flori, là che al è il Retorât dal Studi locâl, chê che e à viodût burascjôs preliminârs di chel Tratât di Cjampfuarmit che ai 17 di Otubar 1797 al veve assegnât un bon toc di Friûl, Venit, Istrie e Dalmazie al Imperi asburgjic, tornant a dâ dongje teritoris separâts par vie politiche di passe mil agns vâl a dî dai timps des invasions barbarichis. In chê biblioteche alì a contin che il zovin gjenerâl francês Napoleon Bonaparte, sustât pai piatoleçs dal plenipotenziari austriac, cont Filip di Cobenzl, i varès fracassade une porcelane di grant presi, regâl de zarine Catarine II, menaçant di fâ compagn cu la monarchie asburgjiche se no ves acetadis lis sôs condizions! Chê visite alì di Fogolâr Civic e Academie dal Friûl e je stade, duncje, te suaze des celebrazions che lis fasin ogni an chês fradaiis alì par chê che si disii “Zornade de Euroregjon”, ai 17 di Otubar, combinazion par câs dai inovâi dal Tratât di Cjampfuarmit (17 di Otubar 1797), che al veve dât dongje sot di une bandiere lis popolazions jenfri Alps e Adriatic, e de Declarazion di Vile Manin (17 di Otubar 2005), che e à screât la trafile de gnove pastanadure “euroregjonâl”. “Par cui che al sumiave alc di plui di un dai solits ents cu la buine intenzion di svicinâ Carintie, Friûl Vignesie Julie, Venit e tieris dongje, il Grup European di Cooperazion Teritoriâl (GECT) ‘Euregio senza Confini r.l. – Euregio Ohne Grenzen mbH’ cussì clamât nol somee vuê ancjemò in stât di concretâ cierts siums. Sigûr che a son stâts za acuardis in argoment di protezion civîl e di sanitât cundut che ancje programs pôc o trop fumôs sul front dal turist, dai traspuarts, de culture a pararessin pursì instradâts, ma nol è par nuie ancjemò masse adore salacor domandâsi trop che pardabon la vore di cheste organizazion internazionâl e incidi o e trati di rivâ a fâ un tant ben e no mâl sul spirt de int dai teritoris che a son dentri: trop si proponisi cun di fat che cheste ‘Euroregjon’ e deventi – o e torni, pensant a cierts tradizions storichis – une identitât, un partignî parsore dai confins juste ben sintût?”. Ve ca i dubis pandûts ai confradis dal dean prof. Travain sul moment di chês celebrazions. “Dal sigûr che chê Euroregjon che noaltris dal Fogolâr Civic le clucìn in pont di culture e tache tant pôc o par nuie cun cierts progjets menaçôs di macroregjon trivenite e cun ciertis riformis de Costituzion taliane parsore dal cjâf che a tirin a riclamâ la supremazie dal Stât tai rapuarts internazionâi. Memoreant chel Tratât di Cjampfuarmit no sin mighe no a celebrâ une Storie decidude di altris su la nestre piel e nancje i continuâts incrôs e slambraments dai nestris teritoris par interès di vie: o sin ca a bati il claut pluitost su la idee che la nestre Storie – e la nestre glorie, se o pensìn a Aquilee dai timps e a ce che ancjemò e pues significâ – no pues sei ridote dentri di un confin nazionâl precîs. Ve che alore il ben dal Friûl Vignesie Julie e des sôs componentis storichis al sta dentri di in un avignî li che chês realtâts a puedin compartî cun chês vicinantis prin di dut il sens di vê une vicende e une tradizion in comugnâl che a van indaûr juste almancul ae liende aquileiese de origjin; biele sperance e sarès po chê che chês stessis realtâts vuê o doman a podessin cjatâsi tant che part ative di une sorte di confederazion interregjonâl transconfinarie dentri de Union Europeane in stât di fâ sintî in Europe e dai guviers ‘nazionâi’ dai siei singui components in cont de pupilance dai interès particolârs des comunitâts jenfri Alps e Adriatic. ‘Getrennt marschieren, vereint schlagen!’ vâl a dî ‘Marcjâ sparniçâts e combati unîts!’ al jere il sproc di Moltke, gjenerâl prussian: un sproc che al pues ben valê ancje par plui validis futuris impostazions in argoment di plan di agregazion e ricomposizion teritoriâl di diferent stamp, un tant in Italie e ancje a cavalot dai confins dal Stivâl. Lis regjons a puedin colaborâ, ‘confederâsi’, no fondisi, no colâ dentri di realtâts plui grandis – ‘macroregjons’ o ‘euroregjons’ che a sedin – juste par sparî! Chel al sedi ben clâr: a son di mieç il rispiet e il condurâ stes des comunitâts!”.