DOMENIE AI 13 DI LUI 2014

“Stant che l’an cu ven a son juste cent agns de Vuere dal ’15 taliane-austriache che e tornà a dâ dongje sul plan politic la regjon furlane dutcâs ridusintle a confin nazionâl in contrast cu lis sôs tradizions di crosere e trassunt dal Continent cul svant di vignî fûr di Caesar, si segnale che al sarès il câs, in cont di strategjiis di culture e educazion, juste di cjariâ di significâts che a rionzin e che a rimodernin la passade centralitât internazionâl dal Friûl, ereditât storiche aquileiese e foroiuliese, dut chel flurî, che al sarà sigûr, di ocasions di ricuart di chel aniversari vueresc, cul bati, in chel centenari, sul rignuvî la idee di un Forum Iulii no sentinele di une nazion, ma ben cûr di dutis, idee ancje di combinâle là che si pues cul ricuart dai mil e cent agns de incoronazion dal unic imperadôr furlan de Storie ven a stâi il cividin Berengari, che propit tal 915 al cjapà sù la corone europeane di Carli il Grant…”. Il Moviment Civic Culturâl Alpin-Adriatic dal Fogolâr Civic e il Circul Universitari Furlan de Academie dal Friûl, sot tamon dal prof. Alberto Travain, a scrivin al Sindic di Cividât, res. Stefano Balloch, e al Diretôr dal Istitût scolastic comprensîf dal puest, dot.e Annamaria Buttazzoni, “autoritâts che a àn simpri mostradis atenzion, disponibilitât e partecipazion particolârs pes iniziativis di promozion de culture civiche ancje tes scuelis inventadis des fradaiis ca firmadis”; un tant soredut in cercje di colaborazion sul intent di un avigniment di comemorazion, in convigne cul Club UNESCO di Udin e la Federazion provinciâl udinese dal Istitût dal “Nastro Azzurro” fra combatents decorâts al valôr militâr, di fâlu a buinore di sabide ai 14 di Març 2015, intor des Idis di Març famosis, memorie di cuant che al fo stât sassinât il “pater patriae” de localitât e de regjon tal 44 p.d.C., avigniment che si spere che al “movi scuelis di ogni grât, li de statue di Caesar a Cividât, disbatiade di chel so sens nazionalistic mussolinian primarûl tornant fûr cul storic costrut ‘europeistic’ tradizionâl de liende di fondazion cesariane dal Friûl”. Une vision antighe de identitât furlane che cumò torne di grande atualitât…