DOMENIE AI 20 DI LUI 2014

“Dutis lis nazions dal Stât a àn dirits compagns e si ricognossii par inviolabil a ognidune il dirit di curâ la sô nazionalitât e la lenghe che si compagne. Il Stât, duncje, al ricognòs tratament compagn par dutis lis lenghis dopradis dentri dai confins de Monarchie, tes scuelis tant che tai uficis e te vite privade. Tai paîs là che a son a stâ popolazions di nazionalitât divierse lis istituzions educativis a àn di sigurâur a ducj la formazion che e covente ognidun cul so lengaç cence imposizion di lenghis diferentis”. Un tant si leieve tal paragraf 19 de leç costituzionâl asburgjiche dai 21 di Dicembar 1867. Po ben, visitant, compagnade di personâl valit, la biele mostre li de splendide residence Coronini Cronberg di Gurize e intitulade “Uno Stato in uniforme. La società goriziana e l’impero asburgico alla vigilia della Grande Guerra” (“Un Stât in divise. La societât gurizane e l’imperi asburgjic sot de Prime Vuere”), une delegazion dal Moviment Civic Culturâl Alpin-Adriatic dal Fogolâr Civic e dal Circul Universitari Furlan de Academie dal Friûl, rivade di Udin menade dal prof. Alberto Travain, e je restade incantesemade par ciertis espressions ripuartadis suntune tabele di spiegazion là che si sentenziave che il storic imperi sorenazionâl mittel-european al varès vût di lenghe uficiâl ugnule, scrite e fevelade, nome che il todesc, cence zontâ nuie e specificâ altri, cence clarî cemût mai in ogni câs che, par un esempli, l’imni, i proclamis e ancje la scuele no escludevin nancje par ideis chês altris lenghis grandis e piçulis (il furlan fra chês!) de Austrie-Ongjarie, esclusion che invezit e je stade par solit cui Stâts nazionâi liberâi vignûts sù o slargjâts a discapit de Dople Monarchie dai Asburcs. Ancje cence sei inzingarâts dal atrat di une liende austriache-ongjarese insedade no dome – tant che al insinuave simpri chel tabel- su mitologjiis pastanadis dopo, ma su memoriis concretis de vite dal popul testemoneade benon, juste almancul te antighe contee sul Lusinç, cun rivocs di rimarc ancje ben tal rest dal Friûl, al displâs in chest câs culì di imagjinâsi ce strambariis che diviers di chei che a laran a viodi la mostre a metaran dongje su ce che al è stât pardabon l’imperi cosmopolitic asburgjic, impuartant precursôr di unitât europeane, tai fats dut fûr che monolengâl e partant tibiadôr de identitât dai siei popui. Un invît, duncje, a pensâi parsore…