JOIBE AI 27 DI FEVRÂR 2014

Daûr de prime jessude a Cividât di chê cierte lôr iniziative, che e à vût sucesson che mai, il Moviment Civic Culturâl Alpin-Adriatic dal Fogolâr Civic e il Circul Universitari Furlan de Academie dal Friûl, sot dal prof. Alberto Travain, a àn tornât a puartâ ancje a Udin il beromai lôr tradizionâl “Carnevâl Civic Studentesc”, dimostrazion di scuele par inzornâ il ricuart de “Joibe Grasse” o “Crudel Zobia Grassa” furlane dal 1511 vâl a dî il prin grant ribalton di popul de storie europeane moderne. A àn fat un tant tal so aniversari, ai 27 di Fevrâr 2014, juste Joibe Grasse compagn di chê volte. In memorie di chel grant riviel cuintri dal sioram, te Sale dal Popul di Palaç Daronc classis de rame turistiche dal locâl Istitût Statâl di Istruzion Superiôr “Bonaldo Stringher” i àn metût su pal cjâf al sindic Honsell un cjapielat contadin e i àn dât un baston di comant par significâ la sovranitât popolâr, che cun chel po, te cerimonie, il sorestant al à sdrumât jù un torat alegoric, imbastît di un innomenât pitôr e senografist di Udin, il prof. Michele Galliussi, torat intestât a la indiference, batiade di mari dai mâi de Umanitât. Po, simpri chei students, cui professôrs Michele Galliussi, Isabella di Montegnacco e Fabiola Di Lenarda a àn memoreât alì dal storic Poç di Sant Zuan, in plaçute dai Pups (Vie Stringher), lis origjinis furlanis de famose liende di Romeu e Juliete, nassude dal grim propit di chê “Joibe Grasse” tremende, un tant cun leture di bocons des oparis di Luigi da Porto e di William Shakespeare. Tra lis delegazions presintis a jerin sigûr indevant chês dal Club Unesco di Udin, dal Istitût nazionâl talian dal Galon Turchin, de Pro Loco citadine dal Borc dal Soreli di Udin Disore e de Fradaie dal Crist chê dal puest. In rie pe ocasion lis insegnis dai cinc “cuintîrs” dal Fogolâr Civic, puartadis dai banderârs di sezion gjeom. Sergio Bertini, siore Jole Deana, sâr Sergio Dorigo, tenôr Gianfranco Savorgnan e siore Elvia Tosolini, e in plui la bandiere storiche aquileiese tignude dal vessilîr movimentâl sâr Gianfranco Passone.