“O sin stâts incolpâts di butâ jù il cuartîr indulà che invezit si sin batûts par passe dîs agns cun chê di cirî di tornâ a tirâlu sù: a àn parfin tacât a cjapâ sù firmis cuintri di nô che chê e je stade une des robis che i àn plui displasût a la nestre deane Francesca De Marco recuie”. Chest an culì il Coordenament Citadin dal Borc de Stazion di Udin, direzût de puartevôs pro tempore siore Laura Paviotti, e il colegât Moviment Civic Culturâl Alpin-Adriatic dal Fogolâr Civic, sot dal prof. Alberto Travain, no fasin fieste ai 21 di Lui pal complean 154.rt de Stazion e dal suburbi storic de ferade di Udin, “ocasion buine e bielzà tradizion par tornâ a tirâ fûr lis lidrîs di un cuartîr simpri di plui dislidrisât “. No fasin fieste par protestâ cuintri di ducj chei che a àn diminuide, degradade, discreditade la vore dal combatîf comitât di borc, in moviment dal 2003 su ducj i fronts pal ben dal cuartîr, de decence a la sigurece, de urbanistiche a la cussience storiche. “Un mût particolâr par ricuardâ la nestre capesse mai dismenteade, muarte cumò in Març, cul marcâ e denunziâ la inazion, la doplece, la malfidence e perfidie incuintradis in tancj agns di impegn e che a àn vût di gracie di cuintrialtâr la stime e dispès la colaborazion di diviersis Istituzions”.