MIERCUS AI 16 DI AVRÎL 2014

Ve ce che a àn scrit intune letare al Sindic e a la Sorestanzie di Udin par Pasche 2014 chei dal Moviment Civic Culturâl Alpin-Adriatic dal Fogolâr Civic e dal Circul Universitari Furlan de Academie dal Friûl, direzûts dal prof. Alberto Travain, letare sul cantin di un prossim ” regâl pes scuelis di Crucifìs riviodûts in clâf interculturâl”: “Preseadis Autoritâts, sot fiestis di Pasche e sot chê di Sant Marc dai 25 di Avrîl, riferiment storic a primarolis lidrîs compartidis di civiltât di cheste bande dal Continent jenfri Adriatic e Danau, il Moviment Civic Culturâl Alpin-Adriatic dal Fogolâr Civic e il Circul Universitari Furlan de Academie dal Friûl, dade dongje valide rapresentance de societât civîl dal puest, a clamin, achì, la Sorestanzie dal Comun di Udin no a proferî dome, pûr di just, Crucifìs a lis scuelis che e à sot di jê, ma ancje a presentâ juste ben chel fat tant che une ocasion secolâr di valôr par tornâ fûr, come Istituzions, cun chel simbul alì antigon, locâl e globâl, cence prejudizis e in libertât plene e sigûr braurose dai sorestants su la religjon, par ben doprâlu tal dì di vuê di riferiment par podê meti dongje int di plui culturis. Che si fasi di un at comandât par leç, duncje, une ocasion par creâ comunitât. Ve mo il Crucifìs, partant, tornâ simbul di comunance, di un tirâ dongje, di un compagnâ, no di un vualivâ, rimpin comun par sens diferents dâts dongje intun lûc ator di principis bogns juste pardut; un Crucifìs, segn inlidrisât, insedât te particolâr vicende dal Om in chel ciert teritori e prin distintîf di union de civiltât europeane nassude cul pierdi tocs dal antîc mont roman; un Crucifìs tant che memorie e rispiet des vitimis des injustiziis de Umanitât, segnâl di umile regalitât, spieli di glorie imbastide midiant dal servizi e dal sacrifici in favôr dal prossim, stamp di milante agns di sperance e di vitorie dai umigns incuintri dal lôr piês nemì vâl a dî la muart intindude juste di condane a sei scancelâts… Udin che al sepi inalore ancje in chest fâsi erêt mertevul di chê Aquilee che cul meti dongje lis diferencis e à vût instradât e e ispire ancjemò principis grancj di cunvigne morâl, sociâl e civiche. Che, anzit, a chês scuelis che si regaliur propit chê crôs che si dîsi ‘aquileiese’, miscliç antîcs simbui leâts a crodincis e valôrs universâi! Cui auguris plui sclets di buine Pasche”.