SABIDE AI 13 DI SETEMBAR 2014

Un Udin “Aquilee Gnove” che di iniziative dal bas al fâs fieste pal aniversari dai 791 agns dal so implant citadin ‘rivoltantsi’ cuintri di chê part imponude de Storie di capitâl taliane di un conflit european tra fradis sclopât za fa un secul e che dal 1915 tor des Alps di Jevât al à juste viodût sbudielâsi gjernaziis che chê citât furlane fin tal 1751 e jere stade lôr piçule metropul in fat spirituâl tant che cjase ultime dal ben innomenât Patriarcjât internazionâl aquileiês. Une ‘rivolte’ culturâl, civîl, pacifiste, europeiste, pandude midiant di une dediche particolâr a la Presidence de Republiche taliane, formade di un simbolic “grop di Salomon”, fat de preseade ricamadore furlane Antonietta Monzo Menossi, sorte di arc di Sant Marc incrosât, segnacul antîc e divin di concuardie e aleance vâl a dî di unitât te varietât, gjavât fûr dai mosaics de Basiliche di Aquilee. Lis cerimoniis di popul pal “complean” de citât, implantade di borc comerciâl ai 13 di Setembar 1223 dal patriarcje aquileiês Bertolt di Andechs, a son stadis di rigôr ai 13 di Setembar, in Place Mateote o Sant Jacum, li de storiche Pirandule o Colone dal Marcjât Gnûf, trassunt in simbul, gjenar di ‘totem’, de culture civiche di Udin, un tant po di iniziative dal Moviment Civic Culturâl Alpin-Adriatic dal Fogolâr Civic e dal Circul Universitari Furlan de Academie dal Friûl sot dal lôr dean prof. Alberto Travain, in colaborazion cun istituzions e societât civîl dal teritori, in particolâr cui coordenaments sociâi des cinc circoscrizions storichis citadinis dai “cuintîrs” di Marcjât Vieri, Marcjât Gnûf, Aquilee, Glemone e Graçan, il favôr dal Sindic e de Sorestanzie comunâl, la adesion dal Club UNESCO di Udin, de Pro Loco di Citât dal Borc dal Soreli di Udin Disore, de Confraternite dal Crist, dal Coordenament Citadin dal Borc de Stazion di Udin e de Federazion Provinciâl udinese dal Istitût nazionâl talian dal Galon Turchin jenfri decorâts al valôr militâr, cul supuart tradizionâl de Parochie de Nunziade vâl a dî dal Domo e dal Comant Provinciâl di Udin dal Cuarp Nazionâl dai Pompîrs. Oltri che i standarts des delegazions sociâls convignudis, in place e je rivade ancje la bandiere aquileiese, ricuart di fradaie tra popui mittel-europeans, juste chê benedide di Pape Checo, in Place Sant Pieri in Vatican, in mans dal predi furlan pre Tarcisio Bordignon, sul imprin di un 2014 che si memorein in chel i cent agns che e je tacade la Prime Vuere. Daûr de leture de ferbinte letare di dedicazion al President de Republiche taliane firmade dal prof. Travain, il sindic prof. Furio Honsell, intervignût cu la fasse e compagnât dal assessôr su Cumierç e Turist, dot. Alessandro Venanzi, e dal Confenon de Citât, al à proferidis peraulis scletis di stime e concuardie sui intindiments dai promotôrs de iniziative, fasint bogns i riferiments a la fonde aquileiese di Udin intindude par responsabilitât moderne di promozion de pâs tra nazions. A jerin in place ancje i conseîrs comunâi av. Paolo Perozzo e sâr Renzo Pravisano. Pe manifestazion Friuli Doc, che tal so program uficiâl il Sindic al à volût menzonâ, di ocasion di rivuart, ancje la iniziative popolâr dal bas des cerimoniis pal “complean” citadin, il Comun al à fat stampâ des tavaiutis di ricuart, dadis fûr li des postazions informativis dal grant sagron, tavaiutis cun parsore une “mape di furlanetât euroregjonâl”, pastanade dal Fogolâr Civic cun chê di inviulâ fra la int il sens storic de identitât di un “Udin, capitâl furlane de Mittel-Europe fie di Aquilee, tant che cjase ultime dal so patriarcjât internazionâl fin tal 1751”, tant a dî dute une altre robe che une citât-caserme sul confin di une nazion italiche cuintri de barbaritât todescje e sclave cemût che e diseve cierte propagande di agns indaûr. Dopo consegnade ai sorestants dal puest la significative “letare ideâl ai soldâts de Prime Vuere”, resonament critic sul ricuart de Prime Vuere Mondiâl, scrite par furlan, fi dal latin de cosmopolitiche Mari Aquilee, dal linguist prof. David Bizjak, coordenadôr de rame slovene dal moviment euroregjonalistic dal Fogolâr Civic, e je stade la volte de profierte tradizionâl di une piçule targhe cui simbui civics a une rapresentance di citadins stimâts, natîfs di fûr di citât, in onôr dal costum di crosere di int de capitâl de Furlanie. Tal 2014, il ricognossiment pai “benemerits di Udin vignadiçs ‘forescj'” al è stât proferît a bons. Francesco Frezza di Nimis, “mai dismenteât pastôr jenfri i cuei orientâi dal Friûl, di passe dîs agns retôr preseât de capele ‘forensis’ udinese di Sant Jacum…” (convalessent par un signestri resint, si che la dediche le à vude in custodie pre Tarcisio Bordignon, in spiete di consegnâle al destinatari), e a lis sioris Claudia Albini di Prât di Cjargne e Luisa Munini di Cjaurià, “gjerentis storichis de citât viere, vestâls costumadis dal stâ in societât metudis di vuardie di ‘fogolârs’ publics enogastronomics de vite citadine…”. In chel, la simboliche consegne a la Sorestanzie dal Comun di un garoful in ricuart di un citadin che nol è plui e che si calcolilu par mertevul di plui rimembrance istituzionâl e sociâl chest an e je stade par memoreâ puar gjeom. Gino di Caporiacco (Udin 1932-2001), “brilant e mastin inteletuâl e politic furlan, campion preparât e mai clop de autonomie e de culture dal so popul che al à vût stât di chel combatîf rapresentant dentri tes Sorestanziis di Comun e Regjon…”, presint il fi, dot. Alberto di Caporiacco, ancje lui innomenât autonomist e diretôr dal “Giornale del Friuli”. Sodisfazion sclete, tra il public, pe sielte dal personaç, “inteletuâl onest”, tant che e à dit la vôs di popul. In sieradure, il presint di popul a la Colone dal Marcjât Gnûf, cu la imagjine, parsore, de Madone cul Cjistiel, rivoc di une identitât citadine di ricet e bastion, là che cinc garofui, tant che i cinc “cuintîrs” li che si dividevin i citadins primarûi di Udin, a son stâts poiâts, cui onôrs civics a bandieris pletis e il cjant dal imni “Oh ce biel cjiscjel a Udin”, daûr de benedizion dade dal prevost, bons. Luciano Nobile, par man di un pichet di Pompîrs ven a stâi la plui antighe difese civîl dal teritori, testemoneade a Aquilee za dal timp dai Romans, che a un so costum di prin dal taramot furlan dal 1976 chê cerimonie istesse si à ispirât. Note di rimarc: la clamade a rimodernâ la liende di Aquilee tant che riferiment a lidrîs in comugnâl, motôr di pâs e colaborazion tra gjernaziis diferentis, che al forme di un cuart di secul il cjaval di bataie dal Fogolâr Civic, cumò e à incuintrât ancje il bon acet dal Quirinâl, che al à rispuindût cun cordialitât al apel indreçât de fradaie tal centenari de Prime Vuere a sorestants e popui de Mittel-Europe dâts dongje une volte dal grant Patriarcjât aquileiês, un apel a pro che si torni a scuvierzi, a inviulâ, a invalorî la Storie che e unìs! Tes delegazions dal Fogolâr Civic a jerin i conseîrs movimentâi gjeom. Sergio Bertini, sâr Giuseppe Capoluongo, prof.e Renata Capria D’Aronco, siore Marisa Celotti, siore Jole Deana, tenôr Gianfranco Savorgnan e, dai banderârs, sioris Laura Nazzi e Elvia Tosolini in plui dal vessilîr gjenerâl sâr Gianfranco Passone.