VINARS AI 25 DI AVRÎL 2014

Pe dì di Sant Marc, vinars ai 25 di Avrîl 2014 une delegazion dal Moviment Civic Culturâl Alpin-Adriatic dal Fogolâr Civic e dal Circul Universitari Furlan de Academie dal Friûl e à partecipât a la tradizionâl “Rogazion Granda” di Bielvedê di Aquilee, alì de storiche Pinede di Sant Marc indulà che, daûr de liende, al sarès sbarcjât l’evangjelizadôr de Mittel-Europe, pari dal gloriôs Patriarcjât aquileiês. La rapresentance euroregjonalistiche, rivade di Udin, e je stade ancje a Messe difûr de antighe capele savorgnane intitulade al Sant che juste a Aquilee al varès scrit il test dal so Vanzeli e implantade chê comunitât cristiane che si sarès po dopo slargjade tra Adriatic e Danau, tra Svuizare e Ongjarie. Segnalade di lûc une vore significant pes lidrîs di civiltât dal Friûl e de Europe mezane par bocje di int di grant studi de stampe dal prof. Gilberto Pressacco recuie, che insiemi cuntun ativist mai dismenteât dal Fogolâr Civic, il maressial forestâl Ermes Silvano Candido, al à vude la sodisfazion di scuvierzi, te pinede, sot de gleseute, une biele aghe di risultive che e spissule fûr, riferiment antigon in simbul a la resurezion cristiane e a la liberazion de muart, chê localitât e je calcolade dal moviment civic culturâl direzût dal prof. Alberto Travain di vere “fontane”, in sens figurât, de culture euroregjonâl alpine-adriatiche. In plui dal coordenadôr prof. Travain e dal cancelîr sociâl siore Jole Deana, te delegazion a jerin i siôrs Marisa Celotti, Eralda Domini, Eugenio Pidutti, Gianfranco Savorgnan e Adriano Zoccolo.