Coiars, ignobii, indaûr, raziscj, fassiscj, naziscj e ce altri: ve culì i titui che plui dispès cetancj sorestants di politiche, economie e culture dal Friûl Vignesie Julie e de Italie a destinin a cui che vuê al denunzie lis “preferencis” di une patrie marastre che, di une bande, e ricêf e manten cualsisei che al rivi, di chê altre, dispès e rinee e e mincjone i siei fîs plui debui ven a stâi i citadins onescj no imberdeâts cul podê e i siei tirepîts. Pape Checo istès, scoltade guide internazionâl no mighe nome su la religjon, orientament di ideis sui plui diviers fronts culturâl, sociâl, economic, politic, nol à someât tant cjalt promotôr di un dialic fra lis parts di chest moment storic dramatic pes nazions de Vecje Europe, ma si à plui che altri presentât di campion dogmatic di un principi di ospitalitât che no si discut, tal troi si capìs de miôr Cristianitât. Ma, invezit, al è ce discuti. Lant daûr de Biblie, lis muris di Gjeric a son ladis jù devant de profugance israelitiche che no dome e à invadût chê citât ma ancje e à pesseât a disterminâle par no contaminâsi cu la civiltât dal puest. Chei che a àn difindût Gjeric jerino raziscj, contraris a dâ di lozi a forescj bisugnôs, o juste eroics patriots che si son batûts pai lôr “fogolârs”, par dîle a furlan vie? E i disfortunâts natîfs italics che a àn olsât a frontâ il troian Enee sbarcjât tal Lazi: cui ju ricuarde, cui mai ju à celebrâts, cui mai ju à capîts? Raziscj ancje lôr o ben patriots purpûr scalognâts? La Storie, locâl e globâl, e je plene di profugancis o migrazions trionfantis parsore des popolazions nativis e puartadis in palme tant che vitoriosis. Ce sono i Merecans dai Stâts Unîts? Sul imprin piçui trops di profugance scjampâts di une Europe in balie des vueris di religjon e acetâts di boncûr dai natîfs vâl a dî di centenârs di antighis e valorosis nazions po massacradis, somierzudis, des ondadis di migrazion vignudis daûr e paradis di chel Diu nus vuardi dal 7. Cavalarie. Cui plui cui mancul, ducj nô, in Friûl, in Italie, in Europe, o vin vût o o vin vuê di gnûf, in famee, emigrants ator pal mont e o sin ducj, cui plui cui mancul, fîs o ben dissendents di imigrâts. I nestri basavons plui lontans, ca te Alte Adriatiche, lezendarie profugance di Troie, si son imponûts cu lis tristis su la int dal puest e compagn pôc o trop a àn fat i nestris vons celtics, latins, gjermanics e slâfs. E stant che cui che al vinç al à simpri reson ancje se no le à, si à ben celebrât simpri i vincidôrs e smenteât i batûts. E à fat cussì par tant timp la France vâl a dî la Galie di Asterix – sentenzie auliche! – che nome tal Votcent e à riscuviert il valôr di un Vercingetoris e dai siei Celtics ribei cuintri de invasion romane ‘civilizadore’. Razist ancje Vercingetoris? E ce isal di dî, se propit si vûl, di un Mazzini, di un Garibaldi o di un Cavour, cussì contraris al domini austriac in Italie? “La clocje ise raziste stant che e ten dongje ator di se prin di dut i siei poleçuts?” si diseve une volte in cierts pôc o trop iluminâts ambients culturâi friulaniscj. La domande e jere, si capìs, retoriche: sigûr di no. Chê clocje li e jere pursì une buine mari: ce che la Italie salacor no je mai stade e compagn la storiche Patrie dal Friûl tant che dispès la Union Europeane di cumò!
Prof. Alberto Travain
Coordenadôr Gjenerâl FOGOLÂR CIVIC
Dean ACADEMIE DAL FRIÛL