JOIBE AI 11 DI SETEMBAR 2014

Ai 11 di Setembar 2014 il Moviment Civic Culturâl Alpin-Adriatic dal Fogolâr Civic e il Circul Universitari Furlan de Academie dal Friûl, in concuardie cul Club UNESCO di Udin e cu la Federazion Provinciâl di Udin dal Istitût nazionâl talian dal Galon Turchin jenfri decorâts al valôr militâr, a àn memoreade la storiche bataie di Viene dal 1683, dulà che i Stâts europeans dâts dongje dal frari furlan Marc di Davian, campion par dute la Mittel-Europe, a àn vude strucjade la armade dal Turc che e tratave di invadi il cûr dal Continent. Il ricuart simbolic al è stât te capitâl dal Friûl Storic, devant dal palaç di famee dal feldmaressial udinês baron Carli Marie de Pâs, che in chê lote famose al jere comandant dai coracîrs dal Sacri Roman Imperi todesc, tal mieç dal esercit european. “Vuê nô, cjase nestre, o podìn sei pronts a rispietâ e tirâ dentri culturis e religjons diferentis di chês de tradizion nostrane – al à dit il dean dal Fogolâr Civic e de Academie dal Friûl, prof. Alberto Travain -, ma no vin di dismenteâsi che, ben o mâl, la civiltât comune europeane e je nassude di une sotrazion di chê intercontinentâl romane e cristiane cuant che l’Islam i à gjavât a chê i litorâi africans e asiatics dal Mediterani. Di chê volte la Europe si à confondût cu la Cristianitât, pûr magari tradint i siei principis di fonde, si che seculorums di un tignî bot cuintri de invasion di potencis musulmanis, ancje ben tramit di culturis rafinadis, a àn cence fal concretât un spirt european unitari che in dì di vuê al pues butâsi laic e sigûr vierzisi al bon acet di tantis diferencis, ma no dineant, par amôr di dignitât, lis sôs lidrîs storichis. Ricuardâ la bataie di Viene, duncje, nol vûl dî stiçâ lis boris dal contrast jentri Ocident e levantins fanatics ma inlidrisâ in ogni câs il sens di cjaveçs e stamps particolârs di un trat european pastanât tai secui e che al cûs ben di plui di ciertis clopadiçs discors di Brussel”. Tes delegazions dal Fogolâr Civic a jerin i conseîrs movimentâi sâr Giuseppe Capoluongo, prof.e Renata Capria D’Aronco, siore Marisa Celotti, siore Jole Deana, tenôr Gianfranco Savorgnan, in plui dal vessilîr gjenerâl sâr Gianfranco Passone e dal dot. Gianpietro Babuin cu la bandiere storiche de sezion dal Friûl “di là da la Aghe” in onôr di Marc di Davian.