JOIBE AI 24 DI AVRÎL 2014

Joibe ai 24 di Avrîl 2014 une delegazion dal Moviment Civic Culturâl Alpin-Adriatic dal Fogolâr Civic e dal Circul Universitari Furlan de Academie dal Friûl menade dal prof. Alberto Travain, e je rivade a pueste di Udin te citât stelade di Palme, progjet dal furlan Julius Savorgnan che al voleve fânt une “Aquilee gnove”, cun chê di onorâ cui che al à evitade la sô distruzion par man dal Nazist in fin de Ultime Vuere, daûr che i Talians za le vevin brusade co si ritiravin te Vuere dal ’15. Alì de glesie di Sant Francesc venti là, che jù pal Sîscent li al jere passât parfin Marc di Davian prin de bataie famose di Viene che e veve fermât il Turc che al vignive indevant in Europe, la delegazion di popul di Udin e à metût jù un mac di rosis cun dediche “Al plevan e a la int che a àn salvade Palme” su la tombe dal prevost bons. Giuseppe Merlino che, vie pe gnot tra i 24 e i 25 di Avrîl 1945, al veve tratât a dilunc cul comant todesc rivant in finâl a salvâ la localitât de devastazion. “Fasêtmi saltâ me impen de citât!” i varès dit il predi al comandant dai Mucs, stant a ce che a disin testemoneancis validis tiradis sù tal 2012 dai fruts di scuele dal prof. Travain, che in chê volte al jere in servizi a Palme e al veve inviulade une riscuvierte di chês memoriis tra students e citadins, cjapant sù provis preziosis di ricuarts dal popul ancje ben in cont de part impuartante vude in chei fats, di une bande, dal interprit Luigi Ottomeni, e, di chê altre, de famee Mersi, che e veve in citât il maneç dai telefons publics. A dâ il bon acet a la delegazion civistiche di Udin al è intervignût il prevost di cumò, bons. Angelo Del Zotto, che al à marcât trop che il salvament di Palme in graciis di bons. Merlino al sedi stât in efiets la espression plui scjassose di une vite interie consacrade in plen a la sô comunitât e in particolâr ai plui puars. E al à volût ricuardâ ce maniere che l’eroic plevan so predecessôr, stât in funzion par dôs vueris mondiâls, di famee abenade, al sedi muart puar in cane, che il patrimoni di cjase sô lu veve dât a pro de puare int. “E jere famose in citât la sô vieste scussade e mendade, puartade cun tante dignitât e autoritât” al à dit l’innomenât gjornalist palmarin Silvano Bertossi, che al à cognossût Bonsignôr di persone e al à volût marcâ la impuartance dal piçul at fat de delegazion citadine di Udin: “Palme no à dismenteât bons. Merlino, ma nissun palmarin in vuê, tal aniversari di chê gnot dal 1945, nol puarte rosis di sô iniziative su la sô tombe!”. A àn contribuît inte cerimonie cuntune lôr testimoneance ancje il president de locâl Cjase di Polse, Flavio Zanus, sustignidôr mastin de memorie dal plevan benefatôr, che al è timp che al sburte di intestâi cualchi sede publiche di rivuart, intenzion cjapade sù l’an passât dai sorestants dal Comun pe intitulazion prossime dal ospedâl di Palme. Peraulis di plene concuardie a son stadis pandudis, po, de deane dal Club UNESCO di Udin, prof.e Renata Capria D’Aronco, rivade te citât stelade dutun cu la delegazion dal Fogolâr Civic. Di bande sô, il prof. Travain, ricuardant il “Leon di Palme” – sô definizion, rivoc dal non dal pape storic che al à fermât Atile -, si à frontât su la “impuartance culturâl di une atestazion civiche spontanie de memorie di un teritori tal cuotidian de zornade di vuê, fonde di une cussience di popul sleade dai resonaments e des cjacaris dal podê”. La delegazion movimentâl a Palme e jere formade dal dean prof. Travain, dal cancelîr sociâl siore Jole Deana, de prof.e Renata Capria D’Aronco e des sioris Marisa Celotti e Mirella Valzacchi.