JOIBE AI 8 DI MAI 2014

“Cun chestis rosis, cun chestis bandieris, cun chescj cjavai, ricuardant chê zornade dal mês di Mai che une volte i disevin la ‘Joibe des Fritulis’, cuant che la zoventût di Udin, furnide di frascjis fluridis, e veve costum di lâ fûr di citât a cjaval pe rituâl scampagnade fûr puarte, ideâl nuviçâl tra Udin e il Friûl, tra une capitâl e il so teritori, nô citadins, nô associazions, nô semplice e libare societât civîl, ve culì presints, si è ca a confermâ, devant di cheste sede che e je simbul storic de iniziative dal bas, la nestre plui salde intenzion di dâ une man, ancje propit dutun cun chei che a comandin tal nestri Comun, par che si rionzi chel spirt che al à fat par un votcent agns de comunitât nostrane un valent tamon in pont di culture, economie e politiche de regjon crosere de Europe. Une man slungjade, di bogns citadins, viers i sorestants, duncje. Une profierte che culturalmentri al sarès cif e çaf a parâle indaûr”. Ve, duncje, il costrut dal discors, fat devant des bandieris in rie dai cinc “cuintîrs” citadins antîcs, par bocje dal dean dal Moviment Civic Culturâl Alpin-Adriatic dal Fogolâr Civic e dal Circul Universitari Furlan de Academie dal Friûl, il prof. Alberto Travain, co e je stade la presentazion dal progjet “Mai Civic – Vierte Udinese”, “libare iniziative di associazions par rionzi comunitât jenfri citât e teritori sul troi des tradizions dal Mai inte capitâl dal Friûl Storic”, progjet instradât di chês dôs fradaiis tal 2002 e tornât cumò a tirâ fûr cu la colaborazion di diviers sogjets de societât culturâl ative citadine e regjonâl. La presentazion publiche, ai sorestants dal Comun, e je stade fate joibe ai 8 di Mai 2014, in Place dai Grans a Udin, su la puarte dal Ospedâl antîc di Sante Marie de Misericordie, simbul de liende dal metisi adun in associazion te capitâl furlane. Un tant al è stât in particolâr in colaborazion cu la Pro Loco di Citât dal Borc dal Soreli di Udin Disore tant che cul Circul Sportîf Diletantistic “Equitrek” di Colorêt, in cunvigne cul Club UNESCO di Udin e cul tratament gjenerôs dal Bar Savio storic che al è li tacât. Daûr dai salûts dal inz. Gildo Solari, in rapresentance de Pro Loco citadine, che e je stade la prime in Italie di chê fate, sot dal arch. Giuseppe Vacchiano, che e veve intenzion di proponi domenie ai 18 di Mai 2014 une zornade di iniziativis sociâls-culturâls jenfri Borc Soreli di Udin e Comuns dongje, cul titul “Mai Civic di Udin disore”, al à fevelât l’assessôr dal Comun dot. Enrico Pizza, mandât dal Sindic, prof. Furio Honsell, che ur à dit graciis a promotôrs e sostenidôrs dal progjet pensât dal Fogolâr Civic e de Academie dal Friûl pe disposizion splendide a colaborâ cul Municipi par tornâ a tirâ sù la funzion de citât tal armoniôs rapuart cul teritori. “Stin de stesse bande: de bande di Udin!” al à dit Pizza, zontant “un agrât par chel regâl che nus vês fat cul vênus iniment lis tradizions e tornant ancje a puartâ i cjavai dentri te citât: fasìn in maniere che l’an che al ven, in gracie di voaltris e cul Comun, Udin al puedi cjatâsi ‘invadût’ di ducj chescj ricuarts, colôrs e presincis!”. L’assessôr al à ricevût, dopo, il simbul storic de fieste, un “mai”, ven a stâi une frascje fluride e furnide dute di curdelis di tancj colôrs cun parsore i nons des fradaiis promotoris de iniziative, che jal à consegnât di persone il dean regjonâl de “Lega Attività Equestri” dentri de “Unione Italiana Sport Per Tutti”, la siore Giovanna Fabiani, al comant di une biele comparse a cjaval, che, in ricuart di une volte, des cavalcadis citadinis dal mês di Mai dutun cul pali des feminis di Udin, si è presentade, cun compagnatori di musicants, alì dal porton di Graçan che al jere juste li dongje, in Rive di Graçan apont, che a jerin alì a spietâle lis delegazions des associazions dentri tal progjet. Tal ricuart de tradizion di Mai de “Joibe des Fritulis” cussì clamade, al assessôr e ai organizadôrs ur son rivadis in finâl chês dal plui carateristic costum furlan, ancje la “salviade” (fritulis di salvie), vignudis fûr des cusinis tant splendidis dal Bar Savio. Il president Travain, sorestant dal Fogolâr Civic, si à palesât sodisfat pal impegn di condivision cjapât sù dal Comun parmieç dal assessôr Pizza e al à ancje batût che a pet dal “scjassôs cidinôr di cualchi gjornâl locâl, che al somee che nol fasi dabon un servizi come cu va par informâ la int in cont di iniziativis dal bas di une tâl”, il lunari, invezit, dai avigniments dal Comun al à ben ripuartade la gnove dal fat, dut impegn di culture e organizazion a gratis. “Fiestis di Mai. – In chest mês culì, la prime joibe che i disin des fritulis, la zoventût di Udin a cjaval, cun dut un sunâ di pivetis e di trombetis, e saltave fûr cui mais, vâl a dî cun ramis incrosadis di rosis, e ju plantave devant de puarte di cjase des fantatis, tant dentri che fûr de citât, e tornant indaûr e furnive di frascjis verdis i siei cjavai. Ancje la int dal popul e leve daûr di chest costum cortesan e e faseve fieste compagn dai siôrs pal tornâ de vierte e de stagjon dai amôrs… Tal 1375 il Consei ur permetè ai umigns di Graçan che lis lôr feminis a podessin cori il pali tal borc la prime joibe di Mai innomenade joibe des fritulis (die iovis crispellarum) par vie di chê friture di paste dolce che si usave mangjâ in chê dì…”. Ve ce che al scriveve tal 1898 il storic furlan Vincenzo Joppi, che di chestis sôs notis al cjape mani vuê il progjet “Mai Civic – Vierte Udinese”, cu la ambizion che al buti fûr butui par ogni bande a pro de “rinassince” de “capitâl” de piçule patrie furlane cûr de Europe. Presints I banderârs sociâi gjeom. Sergio Bertini, siore Marisa Celotti, siore Jole Deana, siore Laura Nazzi, tenôr Gianfranco Savorgnan, sâr Adriano Zoccolo e siore Gianna Zuccolo.