JOIBE AI 8 DI ZENÂR 2015

“La juste condane di ducj in cont di chel malandret atentât teroristic, di stamp islamic estrem, alì dal gjornâl di satare Charlie Hebdo di Parîs che e fasi in mût e maniere che dute la Europe e torni a cjatâsi ator di chei cierts grancj valôrs, cence cedi, però, a tentazions di magnificâ ancje ben par fuarce une libertât ‘ocidentâl’ di stampe che tal so non, cun disinvolture, si scancelin o pûr si folpein no da râr dignitâts e sintiments ugnui o di tancj di lôr e dut cul parâsi daûr dal solit apel a principis di tolerance che al somee che aromai no vedin plui brenis. No vin di movisi par difindi, duncje, l’Ocident cemût che si presente ma un Ocident sigûr riecuilibrât tai siei valôrs di riferiment, no insotanât di une ‘ditature de libertât’ che te pratiche e rive a sconfondi il dirit sacrosant al contrest cu la permission di ridi e di ufindi la sensibilitât dal prossim. Clarît un tant, la civiltât stramilenarie europeane, cui siei milante trats nazionâi, regjonâi e locâi, ‘rincivilide’ si capìs a pet dal discjadiment sociâl culturâl di cumò, in fat di principi no pues acetâ tal so teritori di sei metude sot scac di culturis par storie forestis ma ben che a incidin simpri di plui te zornade dal Continent Vieri”. Ve la piçule note che, cun chê, di Udin, de Furlanie, la direzion dal Moviment Civic Culturâl Alpin-Adriatic dal Fogolâr Civic e à motivât propit su la gnove di chê barbariche coparie te capitâl francese dai 7 di Zenâr 2015, cul dî di sei dongje di just a lis fameis des vitimis e a dute cuante la nazion. Il Fogolâr Civic al è tant timp che si messede par inviulâ une rifondazion interculturâl des identitâts storichis di teritori de Europe partint di chê particolâr crosere continentâl che e je la regjon furlane.