LUNIS AI 29 DI SETEMBAR 2014

Svintulâ di bandieris e rosis su pes muris de citât viere in onôr dai muarts pe comunitât tai secui a dilunc in riferiment di chei cinc cuintîrs di Marcjât Vieri, Marcjât Gnûf, Aquilee, Glemone e Graçan che cussì a jerin organizâts in principi i citadins di Udin in pâs e in vuere. Il Moviment Civic Culturâl Alpin-Adriatic dal Fogolâr Civic e il Circul Universitari Furlan de Academie dal Friûl, sot dal lôr dean prof. Alberto Travain, a àn rinovât di celebrâ ogni an, pe vincjesime volte, l’inovâl civic udinês di Sant Michêl, sorte di “fieste dal sitadin” in memorie di grancj costums dal popul-esercit comunâl che si deve dongje te Ete di Mieç propit in chê date, formant la famose samblee dal Renc, istituzion massime di democrazie direte locâl. “Ancje se cierte stampe nancje no us da spazi, o vês ‘ fermât ‘ par un moment il trafic e riclamât la citât a ricuardâ la sô storie” al à dit l’Assessôr su la Mobilitât dot. Enrico Pizza, intervignût in rapresentance dal Municipi. Presints, te clape, i conseîrs movimentâi gjeom. Sergio Bertini, sâr Giuseppe Capoluongo, siore Marisa Celotti, siore Jole Deana, siore Antonietta Monzo Menossi, tenôr Gianfranco Savorgnan e, dai banderârs, la mestre Manuela Bondio, sâr Carmelo Fiore e siore Elvia Tosolini. La iniziative e à vude la adesion culturâl de sorestanzie provinciâl dal Istitût nazionâl talian dal Galon Turchin e chê dal Club UNESCO di Udin. Finide chê “vuaite” vâl a dî chê ‘ronde’ culturâl de memorie dut tor ator il zîr de citât storiche, cul cjapâ sù tradiziononis civichis furlanis antighis di çoc langobart si à clamade dongje une samblee di popul, rapresentative di diviersis animis e organizazions de societât civîl, e midiant di publiche votazion si à elezût dean gnûf dal Coordenament Citadin dal Borc de Stazion di Udin il stimât primari dot. Fernando Luisi, al puest di puare siore Francesca De Marco, che no je plui e no si dismenteile, dean che al varà di puartevôs, par dongje, la preseade educadore ative in chel comitât che ducj le cognossin, siore Laura Paviotti. Daspò de riunion, sore sere, juste li dal Poç di Sant Zuan che al è simbul storic di moviment di popul par vie che al ricuarde l’innomenadon ribalton civîl de Joibe Grasse dal 1511, il prof. Travain, president dal Fogolâr Civic, i à consegnât come cerimonie a chê gnove sorestanzie sociâl la bandiere dal coordenament dal Borc de Stazion, che le veve in custodie lui daûr che e veve vuarnide la casse de deane De Marco juste ai funerâi, che il so ricuart , te comandarie popolâr, lu à rionzût cun grande maestrie prin di dut pre Tarcisio Bordignon che al à memoreade la persone tornant a tirâ fûr biei scrits comutîfs di Sant Augustin.