MIERCUS AI 3 DI JUGN 2015

Par vêur iniment ai siei citadins che Udin in vuê e je la uniche citât dal mont storic cristian che e vedi ancje un patron secolâr dongje di chei religjôs catolics, proclamât dal Consei comunâl ai 30 di Març 2001, il Moviment Civic Culturâl Alpin-Adriatic dal Fogolâr Civic al à decidût, duncje, di regalânt une icone artistiche ae comunitât, gjenerose opare dal pitôr Michele Ugo Galliussi e de ricamadore Antonietta Monzo Menossi. La cerimonie di consegne al Comun de icone dal Patron Civîl Beltram di Saint Geniès, patriarcje medievâl di Aquilee, lidrîs des tradizions democratichis di Udin, e je in program pai 13 di Setembar 2015, 792. Complean de Citât, ma une delegazion dal Fogolâr Civic je à za presentade di persone al sindic prof. Furio Honsell cumò intun incuintri ai 3 di Jugn, stât te Sale de Zonte di Palaç Daronc, li che il Sorestant al à vût maniere di stimâ, oltri che il valôr artistic, ancje ben il grant significât simbolic: “Un patron secolâr vuê al pues funzionâ tant che une impuartante lidrîs di inclusion e union di une comunitât. Fondamentâl al è che di un tant si vedi il sens!” al à marcât il dean dal Fogolâr Civic, prof. Alberto Travain, che al à menade une delegazion formade dai confradis gjeom. Sergio Bertini, pre Tarcisio Bordignon, siore Marisa Celotti, siore Jole Deana, tenôr Gianfranco Savorgnan. Travain I à ancje vût iniment al Sindic la lungje trafile sociâl-culturâl e istituzionâl fate dal Circul Unversitari Furlan de Academie dal Friûl, branc storic dal Fogolâr Civic, e rivade insom cu la votazion dal document di Prampero de Carvalho tal Consei citadin. Il prof. Honsell, compagn di simpri, si à mostrât agrât e dabon atent aes intenzions dal Fogolâr Civic e a son restâts, come proponût, di tornâ a viodisi ai 13 di Setembar, inovâl di fondazion de citât celebrât de fradaie fin dal 2001.