MIERCUS AL 1N DI OTUBAR 2014

“Devant des dificoltâts di un sisteme di scuele public, motôr prin destinât di cunvigne civîl e progrès, li che cui che al è a scuele e fameis par dongje, par vie ancje di scjarse definizion des parts, al è facil che a vedin dispès cjamp libar di contrastâ se no juste di invadi parfin i assums di cui che al fâs scuele in onôr di principis pustiçs e svoladis di democrazie, dal Friûl, cjantonut di Italie e pûr cûr de Europe, cul fin preminent di instradâ un ordin democratic che al guvierni tal just la Scuele midiant dal Stât o ben di altris istituzions publichis teritoriâls rapresentativis par vie politiche de comunitât sovrane, si clamin citadins, politics e sorestants de Republiche Taliane a messedâsi di ce che ur compet par mût che lis scuelis no si confermin di lûcs di privadis e improvisadis contratazions o di tratativis tornadis a vierzi sul plan locâl in materie di regulis e partignincis, ma ben par puest alì che si aplichin di istituzion e cun profession normativis prodot di partecipazion politiche vere adalt, dineade dibot in zornade di vuê e concedude dabàs pardut midiant di autonomiis partecipadoriis in mans dai singui istitûts e des lôr comunitâts scolastichis, parant a fruçons la ufierte formative tai teritoris se no ancje tibiant la publiche funzion in chel ciert setôr di prime impuartance pal condurâ des istituzions di ogni civîl comunance umane”. Ve ce maniere che, al 1n di Otubar 2014, ricuardant a Udin la tradizion dal prin dì di scuele comun di une volte par dute la Italie, “il Moviment Civic Culturâl Alpin-Adriatic dal Fogolâr Civic, scoltade e acetade peraule di tante int e societât civîl juste su la franze nordorientâl de Europe a misdì des Alps”, al à vût indreçât “un apel di cûr a citadins, politics e sorestants de Republiche Taliane par re/instaurâ un sens di Stât, di democrazie e scuele publiche”, firmât in place a Udin là che indaûr e jere une scuele, su la storiche Place dai Grans o “XX Settembre”. Un apel, chel culì, destinât, si capìs, prin di dut, al Guvier di Rome, che al è daûr a inviulâ un resonament compartît su lis dibisugnis di riforme dal sisteme scolastic talian. In pratiche, il document, sierât dal dopli sproc “Restaurâ te scuele publiche il sens di Stât democratic! Restaurâ tal Stât democratic il sens de scuele publiche!”, al met il dêt, tal concret, te plaie de insuride e soversive invasion di gjenitôrs e students tal maneç di une Scuele publiche taliane sfruçugnade intun sglavin di “poleis”, di citâts stâts scolastichis autonomis, li che regulis e rapuarts a son definîts sul puest dal pês des parts in belance cun rimants marcâts a des formis di stamp privatistic che daûr di chês “l’aventôr – vâl a dî il gjenitôr o ben il student – al à simpri reson”. Tai intindiments dal Fogolâr Civic e je, duncje, la abolizion o ben une riduzion fuarte di une autonomie e di une partecipazion capilârs concedudis sul front scolastic e no ametudis in plen par cuintri tal cjamp politic, tant par dimostrâ ce maniere che no si infidisi di dâi al popul dirits superiôrs di autoguvier diret e cun dut a chel si lu facoltize pûr fûr di scuare a guviernâ in ultin lis singulis scuelis, istituzions che a saressin clamadis a dâ une impronte fondamentâl a la societât dal avignî. Tal mût di viodi dal Moviment cun di fat, al Stât o pûr, daûr di une buine prospetive autonomistiche o federalistiche, a lis Regjons, ents publics rapresentatîfs pardabon di dute la comunitât civiche e no dome di cualchi component locâl, al varès di competi un coordenament di regulis e organizazion dal sisteme scolastic teritoriâl, cun sperâts disvilups, se si tratàs dabon di lâ in miôr, viers di une gjestion regjonalizade eurocomunitarie. “Tornâ a meti ordin tes scuelis e partint des scuelis” al è, duncje, il sproc che al compendie miôr il sens de posizion cjapade dal Fogolâr Civic su chel argoment.