VINARS AI 16 DI ZENÂR 2015

Daûr di ce che si à concuardât te cunvigne setemanâl di clape di martars ai 13 di Zenâr 2015 alì dal Bar Savio di Udin, cuartîr citadin di ospedâi e fradaiis di une volte, une comission dal Moviment Civic Culturâl Alpin-Adriatic dal Fogolâr Civic, cun dentri il coordenadôr prof. Alberto Travain e i conseîrs gjeom. Sergio Bertini e dot. Carlo Alberto Lenoci, ai 16 e à visitât i ambients publics dal Centri Storic de capitâl de Furlanie dant fûr un stampât cun parsore un “mes culturâl” bilengâl furlan-talian, destinât “a la int dal Friûl, cognossude par civiltât e rispiet” e intitulât “Ni teroriscj ni mincjonadôrs! Coparie di Parigji o ben di Parîs: la nestre Europe no pues sei cussì!”. “Tal cûr de Europe, la int dal Friûl, cognossude une volte pal mont par particolâr sens di civiltât e rispiet, no pues acetâ ni che si menaci la sigurece dal Citadin ni che si ufindin sensibilitâts di un o di trops cu la scuse di une libertât di opinion, espression e stampe che no pues discjolisi di principis europeans storics di rispiet dal Om e de sô spiritualitât plui intrinsiche”. Parsore di dut, il simbul aquileiês a mosaic chel che al rapresente la significative lote tra gjal e copasse, li riviodude tant che contrast tra la lûs e il scûr de civiltât. Par sierâ, un “vive la liberté” par francês, compagnât, par furlan, de prionte “ma tal rispiet e cun sintiment!”. Po ben chel mes, pal popul furlan, in cont dal cantin de identitât europeane a pet de Coparie di Parîs, dispensât dal Fogolâr Civic prin di dut tai ambients di Udin chei de citât viere, incuintrant subit bon acet cetant tra gjerents e aventôrs, al jere firmât dal coordenadôr gjenerâl e regjonâl di chê clape, prof. Travain, e di cinc conseîrs sociâi pai “cuintîrs” dal Moviment citadins e sul teritori ven a stâi Sergio Bertini (Cuintîr I: Udin “Marcjât Vieri” e Friûl Orientâl), Carlo Alberto Lenoci (Cuintîr II: Udin “Aquilee” e Basse Furlane), Gianfranco Savorgnan (Cuintîr III: Udin “Marcjât Gnûf” e Friûl Centrâl), Francesco Nicolettis (Cuintîr IV: Udin “Glemone” e Alte Furlane), Giuseppe Capoluongo (Cuintîr V: Udin “Graçan” e Friûl Ocidentâl).