VINARS AI 23 DI ZENÂR 2015

“Par che a condurin i popui natîfs a àn tignî lis condizions che ur permetin di conservâsi e di ricognossisi. Chês condizions prin di dut a consistin in carateristichis culturâls, che fra chês une lenghe particolâr no je la ultime robe. In Europe, lûc di popolament antigon e ancje fis tantis voltis, chei popui, par condurâ, no podint isolâsi, a scugnin creâsi un ‘spazi vitâl’ basât sul dividi la lôr culture cul numar cressint di int rivade dongje, ve che al è facil che, come etniis, alore, chei popui a sedin segnâts, destinâts a sfantâsi o ben a incrosâsi, ma in pont di culture a puedin sperâ, in cierte situazion, parfin di slargjâsi”: chê la vierzidure dal intervent in lenghe furlane dal prof. Alberto Travain, Coordenadôr Gjenerâl dal Moviment Civic Culturâl Alpin-Adriatic dal Fogolâr Civic e Consulent dal Club UNESCO di Udin pe Formazion Civiche e la Citadinance Ative, tal program dal incuintri public su la “Zornade Internazionâl dai Popui Natîfs ” stât vinars ai 23 di Zenâr 2015 li de Biblioteche Civiche “Don Gilberto Pressacco” di Codroip, iniziative dal Club UNESCO di Udin, cul patrocini de Sorestanzie comunâl dal puest e la colaborazion dal Sovran Ordin di Sant Zuan di Jerusalem. In chel so intervent, che i àn batût tant lis mans, cul titul “Furlan, lenghe di une tiere e no di une int”, il dean dal Fogolâr Civic al à batût su la impuartance de lenghe native tant che spieli di ricognossisi ma ancje sul “tradiment” vâl a dî su chel libar dineâ simpri plui la sô lenghe origjinarie dal popul ladin natîf dal Friûl. “Il fat che il 65% des fameis de Furlanie storiche a sielzin l’insegnament dal furlan a scuele nol vûl dî in automatic par nuie che il 65% de int e dopri par solit il furlan tant che lenghe sociâl ” al à dit Travain, riclamant a lis lôr responsabilitâts politics, Istituzions di pupilance e citadins. “La comunitât native ladine dal Friûl o che e cjape cussience di se, vâl a dî dal valôr dai siei simbui, de sô culture, e un tant lu stramande ai zovins e lu compartìs cui ‘forescj’ rivâts dongje bielzà di tant o pûr juste di pôc o pûr al sparìs di sô volontât!” al à concludût il caporion dal Fogolâr Civic che cjapant sù ancje une resonade dal storic udinês Renzo Moreale, intervignût tal dibatiment, al à volût marcâ la impuartance di stramandâ prin di dut une imagjinative ven a stâi un “orgoi” identitari persuasîf, insedât te cognossince de storie e des liendis “educativis” in fat civîl, culturâl, spirituâl, de stramilenarie “nazion” furlane, costrut ideâl, “produtîf”, “visionari”, di metilu dongje cuntune lenghe che se no no à nuie di plui di chês altris par atrai la int. In finâl dal incuintri, une delegazion dal Moviment formade dal conseîr dal Friûl di Mieç, tenôr Gianfranco Savorgnan, e dal vessilîr gjenerâl, sâr Gianfranco Passone, i à proferît l’anuari sociâl dal 2014 al dean dal Club UNESCO di Udin, prof.e Renata Capria D’Aronco, tant che at di stime e avôt di une simpri rignuvide e valide colaborazion. La rapresentance dal Fogolâr Civic si à po intratignude in particolâr cul prin promotôr dal incuintri public, sâr Enzo Faidutti.