DOMENIE AI 23 DI AVOST 2015

Incuintri animât chel dal Moviment Civic Culturâl Alpin-Adriatic dal Fogolâr Civic stât juste domenie ai 23 di Avost 2015 li de sede famose de Cjase de Contadinance: animât dut par vie che in taule si à dibatût ma ben e no mâl su interpretazion e funzion de religjon cristiane catoliche, lidrîs storiche culturâl comune dal Ocident european e inmò ancje, in confront des sieltis e des espressions privadis e publichis in materie di pâs e di vuere tal dì di vuê. Al è partît dut dal fat de censure imponude tal Venit su cierts sprocs vuerescs de “preghiera dell’alpino” cussì clamade, che a vevin di leile intant di une Messe sul Pas di Sant Polt. Il dean dal Fogolâr Civic, prof. Alberto Travain, poiât prin di dut dal so pareli dal Club Unesco di Udin, prof.e Renata Capria D’Aronco, e dal capelan movimentâl pre Tarcisio Bordignon, al à batût su la necessitât culturâl e civiche che la Glesie e fâsi di stombli par rignuvî la morâl privade e publiche des sôs ‘pioris’ e ancje di chês altris e no che invezit e seondi passive lis tindincis plui libaris, che dispès no stan cuntune oneste leture dal Vanzeli: “Se almancul dal 380 la Glesie istituzionâl si à slontanât di Crist e dal Vanzeli ‘batiant’ il podê e benedisint armis, esercits e vueris, e sarès ben ore cumò di mendâsi: ogni at, ogni clamade cun chel costrut alì, ancje viers di chês associazions di arme militâr che si riferissin a ciertis lidrîs di morâl e culture, a son benvignûts. Po al è clâr che, se al covente, se assalîts, se menaçâts, cun spirt secolâr o vin di difindisi, e purpûr, cun chest, no stin a pretindi che Diu al benedissi lis nestris armis!”. “Si à di sei pronts a miorâ: ce che al è stât si à di ricuardâlu ma si à di salvâ e inzornâ sôl che il bon. E un tant al vâl juste ancje pe Glesie e par chei che i van daûr!” al à fat la prionte pre Bordignon ancje fasint notâ che “lis vôs profetichis, chês che a puartin il gnûf e il miôr, a son simpri stadis tignudis par scandul e pûr a son chês che, in efiets, a àn fat progredî l’Om te sô varie espression!”.