JOIBE AI 18 DI JUGN 2015

Ai 18 di Jugn 1815 a Waterloo, no lontan d Brussel, intune Belgjiche che in chê volte e jere sot de Olande, si à, duncje, decidût il destin di dute la Europe. Cumò a son 200 agns che li si à combatude chê grande bataie che e à segnât la fin di Napoleon e de sô cariere politiche. Une cariere tacade uficialmentri tal 1797 propit in Friûl, crosere naturâl dal Continent Vieri, li che Bonaparte, zovin gjenerâl, i veve imponude al potenton Imperi asburgjic chê che si disii la Pâs di Cjampfuarmit. Passats inalore 200 agns di chê grande bataie ancje il piçul Fogolâr Civic, cenacul di popul euroregjonalistic alpin-adriatic cun cuartîr a Udin, capitâl de furlanetât, si è dât dongje par scrusignâsi su chel fat storic e soredut su ce che al reste tal sens de int di vuê dal ricuart in particolâr dal grant batût di chê volte. “O crôt che il duche di Wellington al vedi salvade la Europe di une ‘globalizazion’ francese!” al à scrit dal Ream Unît in buine marilenghe furlane il zovin confradi sâr Francesco Nicolettis, ricognossint al comandant inglês vincidôr de bataie il merit di vee salvât il Continent di un vualivament funest imponût de France. “Personaç indisponent e arogant – al à dit il gjeom. Sergio Bertini – prodot des ‘libertâts’ pastanadis daûr de disfate dal Antîc Regjim: vignût sù ‘dal bas’, al è stât il prin grant ditatôr de Europe e fondadôr de prime Europe unide, ma lis fuarcis contrariis infin a àn rivât a prevalê e a ‘scjafoiâlu’ plui che a batilu sul cjamp di Waterloo!”. Pe siore Luisa Faraci, atrate fin dai timps de scuele di un Bonaparte “nassût di int semplice e lui di grande çugne, strateghe a dilunc vincidôr”, la bataie di Waterloo e riclame sigûr a resonâ parsore dal fat che “ancje cui che al vinç simpri nol è infalibil e al è destinât prin o dopo a pierdi”. “Sic transit gloria mundi”! Ametint purpûr che “al à fat tant” di Napoleon la citadine Elvia Tosolini, prin di dut, e à condanât la “prepotence dal podê”. “Figure trative ma disinvolte” e à dit la dot.e Maria Luisa Ranzato: “In particolâr come taliane no pues perdonâi il sac dal nestri patrimoni artistic! Po no mi plâs come personaç par dut chel so favorî i siei parincj che mi somee tancj politics di vuê!”. Napoleon tant che “l’eroi positîf borghês che ‘dal bas’ al à unide la Europe”: ve il Bonaparte secont il dot. Carlo Alberto Lenoci che bielzà tal at di incoronazion dal “uom fatale” par “Imperadôr dai Francês” e in chel so famôs “Diu me à dade e puar chel che le tocje!” al à viodût a produsisi une idee di podê, di une bande, basât sul popul, e, di chê altre, calât dal Cîl, cence scugnî meti di mieç la Glesie. Il citadin Paolo Pertusati, preseant chel spieli dal “om che dal nuie si cree imperadôr”, al à dit che “se la Europe napoleoniche e jere unide par volê e sot comant di un regnant francês, no juste propit sul volê dal popul si guvierne vuê la Union Europeane!”: par cui che al vûl capîle! Bonapartiste si à declarade la siore Mirella Valzacchi, vint iniment che ancje parsore de sô steme di famee e figure la acuile di Napoleon. In finâl, la opinion dal dean dal Fogolâr Civic euroregjonalistic, prof. Alberto Travain, che al à tacât disint: “La dominazion imperiâl asburgjiche al puest di chê de nobiltât marcjadante di Vignesie suntun biel toc di Friûl e Venit e je stade in graciis di Napoleon, che chel, ben o mâl, cul Tratât di Cjampfuarmit, al à ‘tornât dâ dongje’ Furlans e Venits dentri dal imperi mittel-european ereditarûl ultin di chel roman e za precoridôr di une Europe unide anticipadore di chê di cumò. Po ben dal judizi che si crôt di dâ in pont di chel tratât e di ce che al puartât, une fradaie euroregjonalistiche alpine-adriatiche e varès, salacor, prin di dut di gjavâ lis conclusions par une ‘ardua sentenza’ culturâl di pandile in cont dal Grant Corsican! Un tant lant in cercje di une prospetive ben definide. Pal rest, a son tancj che mai i ponts di viste di dulà partî par spudâ sentenziis plui o mancul seriis su Bonaparte. Se o ves di sielzi i tra i doi contendents, ve che a Waterloo jo o sarès forsi stât in divise francese, ma sôl che par romantic amôr pes bataiis pierdudis!”.