MARTARS AI 24 DI FEVRÂR 2015

Des alegoriis di toratis, rivoc di simbui antîcs e contrastâts di prepotence, intestadis dai scuelârs ai “vizis” sociâi de vite moderne e sdrumadis tal gjubil di cinc butadis dal “Carnevâl Civic Studentesc” inviulât tra 2010 e 2014 di Fogolâr Civic e Academie dal Friûl, insin cumò ai bossui turîts dal pitôr e senografist udinês prof. Michele Galliussi, destinâts al Censiment di Popul dai Mâi di Cumò, inventât sù dal cenacul civic cun chê di slargjâ il moviment culturâl di denunzie des necuiziis dal dì di vuê e di rivâ a un document prodot di un esam di cussience comun e espression dai ideâi che ator di chei sul puest ancjemò si dâ dongje il consorzi civîl. No plui i “cjistielats” de tradizion furlane contrarie ai nobii, ma emblemis civics di fuartece morâl, riferiments di teritori, ricet, ricuelte e bastion di comunitât, duncje di identitât: cul trat dal tacuin di viaç, Galliussi ur à dât ai siei “bossui” – che ur disevin cussì une volte a lis urnis di consultazion – il fin di riclamâ un monument a torat par ognidun dai cinc storics “cuintîrs ” di Udin dentri de “citât viere” ven a stâi dentri dal tierç zîr di muris chel “raimondin”. Ve che in cunvigne inalore cul dean dal Fogolâr Civic, prof. Alberto Travain, par Marcjât Vieri si à sielt un rivoc dal Puarton di Sant Bartolomiu, che vuê la int lu clame Puarte Manin; par Marcjât Gnûf si si è riferîts al cjampanili di Sant Pieri Martar; pai “cuintîrs ” di Olee, de Glemone e Graçan si à, par ordin, cjalât invezit i tors dal Domo, di Sant Cristoful e di Sant Francesc. Un sest bossul a spiç l’artist lu à creât pai lûcs di publiche riunion dal Fogolâr Civic e in chel câs la sielte dal monument di ispirâsi e je colade, si capìs, sul “tor dal agnul dal Cjistiel”, il cjampanili de glesie dal cjistiel di Udin, simbul di union de Furlanetât. A pôc dîs de presentazion uficiâl de iniziative, ve, duncje, pronts i bossui dal censiment di principis promovût dal Fogolâr Civic.