SABIDE AI 8 DI MARÇ 2014

Une mimose a Udin li dal “Portonat” storic di Graçan, puarte medievâl citadine da cjâf de presinte Via Cesare Battisti, là che tal 1309 – ancje se la targhe metude sù dal Comun no lu dîs – juste lis feminis si distinguerin par indurance in chê resistence famose che e salvà citât e regjon di un colp di stât militâr di chei timps, esempli di dutis chês che jù pai secui, in Friûl e pal mont, a scombaterin e inmò a scombatin par cualchi ideâl di ben in comun: ve ca i 8 di Març dal Fogolâr Civic, fradaie che sot direzion dal prof. Alberto Travain ogni an e rinove di fâi onôr al impegn civîl e sociâl feminîl tant in zornade di vuê che te storie locâl e globâl plui lontane. “Par ogni citât, di ogni bande dal mont, a son lûcs che, cidins, a ricuardin sigûr il valôr des feminis in mil mûts in lote pal ben de lôr int: fasìnju fevelâ, scoltìnju, segnìnju, cuntune rose, a un popul distrat. Nus insegnaran a no dismenteâ dai spiei che dispès o sin pronts a inglidâju juste a stupit vie” al à dit Travain che, sui argoments usuâi dai 8 di Març, al à pandût, di prionte, l’auguri che “la sacrosante pretese dai dirits personâi e di gjenar no vedi no mai di pierdi la smire di une armonie costrutive cul prossim e di un ben comun plui a larc, dut frontât su mil formis di privâts afiets, che a son calamitis che a tirin dongje e che la societât di cumò e à folpeât tal non di principis di libertât stuarte!”. Tra chei intervignûts a la deposizion de mimose dal Fogolâr Civic, cun tant di dediche bilengâl par furlan e talian, a jerin ancje i deans dal Club UNESCO di Udin, prof.e Renata Capria D’Aronco, e de Federazion Provinciâl udinese dal Istitût nazionâl talian dal Galon Turchin jenfri decorâts al valôr militâr, gjeom. Sergio Bertini.